ភ្នំពេញ៖ ស្ថានទូតកម្ពុជាប្រចាំប្រទេសជប៉ុន និងមជ្ឈមណ្ឌលអាស៊ាន-ជប៉ុន (ASEAN-Japan Centre) គ្រោងសហការរៀបចំតាំងបង្ហាញម្ហូបអាហារខ្មែរ (Cambodia Foods Show) នៅជប៉ុន ដើម្បីផ្សព្វផ្សាយពីម្ហូបអាហារ និងផលិតផលសក្តានុពលខ្មែរ ព្រមទាំងជំរុញការទូតម្ហូបអាហារខ្មែរ និងសកម្មភាពនាំចេញនាំចូលផលិតផលខ្មែរ ក្រោមយុទ្ធសាស្រ្តការទូតសេដ្ឋកិច្ច។

ក្នុងកម្មវិធីតាំងបង្ហាញម្ហូបអាហារខ្មែរ ដែលគ្រាងនឹងរៀបចំ នាថ្ងៃទី២១ ខែកុម្ភៈ ឆ្នាំ២០២៥ ខាងមុខនេះ ក៏នឹងមានកម្មវិធី Food Tasting & Networking ដែលជាវេទិកាដ៏សំខាន់មួយ ក្នុងការបង្កើតឱ្យមានទំនាក់ទំនងធុរកិច្ចរវាងបណ្តាក្រុមហ៊ុនអ្នកចូលរួម និងភ្នាក់ងារទេសចរណ៍ជប៉ុន ក៏ដូចជាឱកាសមួយក្នុងការជំរុញអ្នកវិនិយោគជប៉ុន និងទេសចរជប៉ុនមកកម្ពុជា ឱ្យកាន់តែកើនឡើងថែមទៀតផងដែរ។

នាឱកាសតាំងបង្ហាញម្ហូបអាហារខ្មែរនេះដែរ ក៏មានការសម្ដែងចម្អិនម្ហូបអាហារដោយចុងភៅកម្ពុជា ការសម្ដែងសិល្បៈរបាំ ការតាំងបង្ហាញផលិតផលខ្មែរ ការធ្វើបទបង្ហាញអំពីម្ហូបអាហារ និងសក្តានុពលទេសចរណ៍កម្ពុជា។ នេះបើតាមកិច្ចពិភាក្សារវាង លោក ស៊ីន សារ៉ាយ អនុព័ន្ធពាណិជ្ជកម្មអមស្ថានទូតកម្ពុជាប្រចាំប្រទេសជប៉ុន, ឯកឧត្តម ទុយ រី ឯកអគ្គរាជទូតកម្ពុជាប្រចាំប្រទេសជប៉ុន និងតំណាងមជ្ឈមណ្ឌលអាស៊ាន-ជប៉ុន (ASEAN-Japan Centre) កាលពីថ្ងៃទី២៤ ខែធ្នូ ឆ្នាំ២០២៤៕