ភ្នំពេញ៖ លោក សឿន ដារ៉ា នាយកប្រតិបត្តិសហព័ន្ធឧស្សាហកម្មយានយន្តកម្ពុជា បានចូលរួមក្នុងកិច្ចប្រជុំគណៈកម្មការបច្ចេកទេសផ្នែកយានយន្ត ជាមួយសហព័ន្ធឧស្សាហកម្មយានយន្តអាស៊ាន (AAF) និងសមាគមក្រុមហ៊ុនផលិតយានយន្តរបស់ប្រទេសជប៉ុន (JAMA) លើប្រធានបទសំខាន់ៗចំនួន៤ ពាក់ព័ន្ធនឹងការអភិវឌ្ឍផ្នែកយានយន្តទាំងក្នុងតំបន់ និងសកលលោក។ នេះបើតាមការចុះផ្សាយរបស់សហព័ន្ធឧស្សាហកម្មយានយន្តកម្ពុជា កាលពីថ្ងៃទី១៣ មីនា។

ក្នុងកិច្ចប្រជុំនេះ ប្រធានបទចំនួន៤ ដែលលើកមកពិភាក្សា រួមមាន៖ ទី១. របាយការណ៍ទាក់ទង នឹងបរិស្ថានពីបណ្តាប្រទេសអាស៊ាន, បទបញ្ញត្តិស្តង់ដារប្រេងឥន្ធនៈ និងឧស្ម័នផ្សេងៗ, ស្តង់ដារបំភាយផ្សែងចេញពីយានយន្ត និងយន្តការកាត់បន្ថយការបំពុលបរិស្ថាន។ ចំណែក ទី២. កិច្ចពិភាក្សាស្តីពីបច្ចុប្បន្នភាព នៃការអនុវត្តស្តង់ដារយានយន្ត ដែលមានចែងក្នុងកិច្ចព្រមព្រៀង ASEAN MRA មានដូចជា នីតិវិធីក្នុងការអនុវត្តវឌ្ឍនភាពនៃការអនុវត្ត ផលលំបាក ក៏ដូចជាកត្តាប្រឈមនានា តាមបណ្តាប្រទេសនីមួយៗ។

ចំពោះ ទី៣. ស្ថានភាពទូទៅ នៃការអនុវត្តបទបញ្ញត្តិបច្ចេកទេសរបស់អង្គការសហប្រជាជាតិ UN-R និងសុវត្ថិភាពយានយន្ត រួមបញ្ចូលទាំងបទបញ្ញតិបច្ចេកទេស សម្រាប់យានយន្តអគ្គិសនីតាមបណ្តាប្រទេសនីមួយៗនៅក្នុងប្រទេសអាស៊ាន និងទី៤. របាយការណ៍សមាគមក្រុមហ៊ុនផលិតយានយន្តរបស់ប្រទេសជប៉ុន លើការកាត់បន្ថយផ្សែងពុលបំភាយចេញពីយានយន្ត និងយុទ្ធសាស្ត្រ ឆ្ពោះទៅរកគោលដៅអព្យាក្រឹតកាបូននៅឆ្នាំ២០៥០។

តាមការចុះផ្សាយដដែល កិច្ចប្រជុំគណៈកម្មការបច្ចេកទេសនេះ ធ្វើឡើងនៅសណ្ឋាគារ សាន់វ៉េភ្នំពេញ ដែលប្រព្រឹត្តទៅរយៈពេលពីរថ្ងៃ គឺកាលពីថ្ងៃទី១១-១២ ខែមីនា ឆ្នាំ២០២៤ ជាពិសេសក្នុងកិច្ចប្រជុំនេះ ធ្វើឡើងដើម្បីបង្កើនភាពស្និទ្ធស្នាលរវាងសមាជិកសហព័ន្ធឧស្សាហកម្មយានយន្តអាស៊ាន (AAF) និង សមាគមក្រុមហ៊ុនផលិតយានយន្តរបស់ប្រទេសជប៉ុន (JAMA) ជាមួយសមាជិករបស់សហព័ន្ធឧស្សាហកម្មយានយន្តកម្ពុជា៕