ភ្នំពេញ៖ កម្ពុជា-ម៉ាឡេស៊ី បន្តពង្រឹង និងពង្រីកកិច្ចសហប្រតិបត្តិការលើវិស័យអប់រំ ទេសចរណ៍ ថាមពលកកើតឡើងវិញ និងលទ្ធភាពនៃការភ្ជាប់ការហោះហើរត្រង់ពីរដ្ឋ Sarawak មកកាន់កម្ពុជា ព្រមទាំងការតភ្ជាប់រវាងប្រជាជននិងប្រជាជនផងដែរ។ នេះបើតាមកិច្ចពិភាក្សារវាង សម្ដេចធិបតី ហ៊ុន ម៉ាណែត និងឯកឧត្តមបណ្ឌិត Tan Sri Abang Zohari Tun Openg ប្រមុខរដ្ឋបាល នៃរដ្ឋ Sarawak ម៉ាឡេស៊ី និងជាប្រធានអង្គការក្រុមប្រឹក្សាផ្សព្វផ្សាយឥស្លាមតំបន់អាស៊ីអាគ្នេយ៍ និងប៉ាស៊ីហ្វិក(RISEAP)។

ក្នុងជំនួប នាថ្ងៃទី៧ ខែធ្នូ ឆ្នាំ២០២៤ នេះ ឯកឧត្តមបណ្ឌិត Tan Sri Abang Zohari Tun Openg លើកឡើងថា កម្ពុជា គឺជាប្រទេសមួយដែលមានសក្ដានុពល និងកាលានុវត្តភាពជាច្រើនក្នុងការពង្រឹងនិងពង្រីកនូវកិច្ចសហប្រតិបត្តិការ ដែលក្នុងនោះរដ្ឋ Sarawak អាចដើរតួនាទីរួមចំណែកពង្រឹងទំនាក់ទំនង និងកិច្ចសហប្រតិបត្តិការ ក៏ដូចជាការតភ្ជាប់រវាងប្រជាជន និងប្រជាជនប្រទេសទាំងពីរ។

សម្ដេចធិបតី ហ៊ុន ម៉ាណែត បានវាយតម្លៃខ្ពស់ចំពោះអង្គការ RISEAP ដែលបានរៀបចំសន្និបាតលើកទី២០ របស់ខ្លួននៅកម្ពុជា។ សម្ដេចធិបតី ហ៊ុន ម៉ាណែត បញ្ជាក់ថា សន្និបាតនេះបានចូលរួមចំណែក ផ្សព្វផ្សាយអំពីស្ថានភាពពិតរបស់កម្ពុជា ទៅកាន់ពិភពលោក ថា កម្ពុជាជាប្រទេសដែលមាននូវសន្តិភាព និងសុវត្ថិភាព ផ្ដល់ឱកាសដល់ការកសាងនូវសុខដុមនីយកម្មសាសនានៅក្នុងសង្គម ដោយក្នុងនោះ រាជរដ្ឋាភិបាល តែងយកចិត្តទុកដាក់ផ្ដល់តម្លៃ និងសិទ្ធិសេរីភាពពេញលេញនៅក្នុងការគោរព និងការប្រណិប័តន៍ជំនឿសាសនា៕