ភ្នំពេញ៖ ឯកឧត្តម អ៊ិន ខេមរា រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ស្នើឱ្យមន្រ្តីអធិការកិច្ចការងារនៃក្រសួងការងារ ចេះប្រើប្រាស់បច្ចេកវិទ្យាឱ្យបានស្ទាត់ជំនាញ ដើម្បីសម្របខ្លួនទៅនឹងការប្រែប្រួលនៃប្រព័ន្ធឌីជីថល ដែលបច្ចុប្បន្នកំពុងដើរតួនាទីសំខាន់ក្នុងកិច្ចការធំៗរបស់ក្រសួង និងស្ថាប័ននានានៅកម្ពុជា។

ក្នុងពិធីប្រគល់ឧបករណ៍ឌីជីថលដល់ក្រុមអធិការកិច្ចការងារនៃក្រសួងការងារ នាថ្ងៃទី៨ ខែវិច្ឆិកា ឆ្នាំ២០២៤ ឯកឧត្តម អ៊ិន ខេមរា បន្តលើកឡើងថា ការប្រើប្រាស់ឧបករណ៍ឌីជីថលនៅក្នុងកិច្ចការងារប្រចាំថ្ងៃនេះ គឺមានផលចំណេញជាច្រើន ដូចជាពេលវេលា និងភាពច្បាស់លាស់នៅក្នុងរបាយការណ៍ផ្សេងៗ។

ឯកឧត្តមរដ្ឋលេខាធិការ អ៊ិន ខេមរា បានបញ្ជាក់ថា ការប្រគល់ឧបករណ៍ឌីជីថលដល់មន្រ្តីអធិការកិច្ចការងារ នាពេលនេះ គឺជាការធ្វើទំនើបកម្មដល់មន្រ្តីរាជការក្រសួង ក្នុងគោលបំណងធ្វើឱ្យកាន់តែប្រសើរឡើងនៃដំណើរការនីតិវិធីរបស់មន្រ្តីអធិការកិច្ច និងលើកកម្ពស់ការប្រើប្រាស់ប្រព័ន្ធឌីជីថលសម្រាប់ប្រតិបត្តិការការងារប្រចាំថ្ងៃផងដែរ។ នេះបើតាមការចុះផ្សាយរបស់ក្រសួងការងារ នាថ្ងៃទី៨ ខែវិច្ឆិកា ឆ្នាំ២០២៤៕