ភ្នំពេញ៖ ក្រុមហ៊ុន Shanghai Geoharbour Group ដែលកំពុងចូលរួមក្នុងគម្រោងសាងសង់អាកាសយានដ្ឋានអន្តរជាតិតេជោ ក្រុងតាខ្មៅ បង្ហាញបំណងស្វែងយល់បន្ថែមទៀតលើសក្ដានុពលនៃការវិនិយោគលើតំបន់សេដ្ឋកិច្ចពិសេស និងហេដ្ឋារចនាសម្ព័ន្ធនៅក្នុងប្រទេសកម្ពុជា។ នេះជាការលើកឡើងរបស់លោក XU Shilong អគ្គនាយកក្រុមហ៊ុន Shanghai Geoharbour Group នាថ្ងៃទី២១ ខែកញ្ញា ឆ្នាំ២០២៤។

នៅក្នុងជំនួបជាមួយលោក XU Shilong ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ក៏បានលើកឡើងអំពីគម្រោងអភិវឌ្ឍន៍ក្នុងវិស័យហេដ្ឋារចនាសម្ព័ន្ធ ដូចជា គម្រោងផ្លូវល្បឿនលឿន គម្រោងព្រែកជីកហ្វូណនតេជោ និងកំពង់ផែ។ ឯកឧត្តម ស៊ុន ចាន់ថុល បានបន្តថា គម្រោងទាំងអស់នេះ នឹងអនុញ្ញាតដល់វិនិយោគិន ក៏ដូចជាក្រុមហ៊ុន Shanghai Geoharbour Group ផ្ទាល់ អាចពិនិត្យលទ្ធភាពជ្រើសរើសការបណ្ដាក់ទុនវិនិយោគផងដែរ។

ជាមួយគ្នានេះ គណៈប្រតិភូក្រុមហ៊ុន Shanghai Geoharbour Group ក៏បានបង្ហាញអំពីសាវតាររបស់ក្រុមហ៊ុន ដែលមានបទពិសោធចូលរួមសាងសង់គម្រោងធំៗជាង ២០០គម្រោងនៅក្នុងតំបន់អាស៊ី រួមមាន កំពង់ផែ, អាកាសយានដ្ឋាន, និងកោះសិប្បនិម្មិតជាដើម៕