ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភា បានលើកឡើងថា ការដឹកនាំប្រទេសរបស់រាជរដ្ឋាភិបាលថ្មី រយៈពេល ១ឆ្នាំកន្លងមកនេះ គឺទទួលបានលទ្ធផលលើសការរំពឹងទុក ដែលក្នុងនោះកំណើននៃការនាំចេញបានកើនឡើងដល់២០% សុខសន្តិភាព និងស្ថិរភាពនយោបាយ។ សម្តេចតេជោលើកឡើងបែបនេះ ក្នុងជំនួបជាមួយឯកឧត្តម Jang Yun Gon ឯកអគ្គរដ្ឋទូតនៃប្រទេសកូរ៉េប្រចាំកម្ពុជា។

តាមការចុះផ្សាយរបស់សម្តេចតេជោ ហ៊ុន សែន នាថ្ងៃទី៤ តុលា ឆ្នាំ២០២៤ ឯកឧត្តម Jang Yun Gon ក៏បានលើកឡើងថា រយៈពេល ១ឆ្នាំកន្លងមកនេះ របស់រាជរដ្ឋាភិបាលនីតិកាលទី៧ គឹបានដាក់ចេញនូវវិធានការ យុទ្ធសាស្រ្ត គម្រោងអភិវឌ្ឍន៍ និងគោលនយោបាយជាច្រើនដែលទទួលបានលទ្ធផលល្អ ពិសេសគឺការធានានូវសន្តិភាព សុវត្ថិភាព ស្ថិរភាពសេដ្ឋកិច្ច និងការអភិវឌ្ឍរបស់កម្ពុជា។

សម្តេចតេជោ ហ៊ុន សែន បានបន្តថា ទោះបីកម្ពុជា បានជួបវិបត្តិកូវីដ១៩ ក៏កម្ពុជា បានប្រែក្លាយពីប្រទេសមានចំណូលទាប មកជាប្រទេសមានចំណូលមធ្យមកម្រិតទាប និងប្រែក្លាយពីប្រទេសដែលពឹងផ្អែកលើការនាំចូល ទៅជាប្រទេសមានការនាំចេញ និងមានកំណើននៃការនាំចេញថែមទៀតផង៕