ភ្នំពេញ៖ ព្រឹត្តិការណ៍ Gumbal 3000 នឹងរៀបចំឡើងនៅថ្ងៃទី១៦-១៧ ខែកញ្ញា ឆ្នាំ២០២៤ ក្នុងខេត្តសៀមរាប។ ក្នុងព្រឹត្តិការណ៍ដ៏ល្បីល្បាញលំដាប់ពិភពលោកមួយនេះ នឹងមានរថយន្តទំនើបៗ តារាល្បីៗ អ្នកផលិតមាតិកាល្បីៗលំដាប់អន្តរជាតិ YouTuber ល្បីៗ អ្នកធុរកិច្ច និងអ្នកវិនិយោគនានាជុំវិញពិភពលោកចូលរួម។

ក្រៅពី Gumbal 3000 ក្នុងខែកញ្ញានេះ ខេត្តសៀមរាប ក៏មានការរៀបចំនូវព្រឹត្តិការណ៍ធំៗចំនួន២ ផ្សេងទៀត រួមមាន៖ «ព្រឹត្តិការណ៍សមរាត្រី» និង «ព្រឹត្តិការណ៍អបអរសាទរទិវាទេសចរណ៍ពិភពលោក ឆ្នាំ២០២៤»។ តាមការចុះផ្សាយរបស់ក្រសួងទេសចរណ៍ កាលពីថ្ងៃទី១៣ ខែកញ្ញា ឆ្នាំ២០២៤ «ព្រឹត្តិការណ៍សមរាត្រី» នឹងធ្វើឡើងនៅថ្ងៃទី២១-២៣ ខែកញ្ញា ដោយផ្តល់ឱ្យអ្នកទស្សនាមើលឃើញព្រះអាទិត្យរះចំកណ្តាលកំពូលប្រាសាទអង្គរវត្ត។ ព្រឹត្តិការណ៍សមរាត្រី គឺមួយឆ្នាំមានតែ ២ដងប៉ុណ្ណោះ ដូច្នេះក្រសួងទេសចរណ៍ បានអំពាវនាវឱ្យសាធារណជនកុំរំលងនូវឱកាសមើលឃើញព្រះអាទិត្យរះចំកណ្តាលកំពូលប្រាសាទអង្គរវត្តនេះ។

ដោយឡែក ព្រឹត្តិការណ៍អបអរសាទរទិវាទេសចរណ៍ពិភពលោក ឆ្នាំ២០២៤ នឹងប្រព្រឹត្តឡើងនាថ្ងៃទី២៧ ខែកញ្ញា ដោយមានកម្មវិធីសម្តែងសិល្បៈប្រពៃណី ការបញ្ចុះតម្លៃលើសេវាកម្មទេសចរណ៍ ការតាំងបង្ហាញឡាន និងម៉ូតូចាស់ៗជាដើម៕