ភ្នំពេញ៖ ឯកឧត្តមបណ្ឌិត គុណ ញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា លើកទឹកចិត្តឱ្យសមាជិកសភាពាណិជ្ជកម្មអាម៉េរិកប្រចាំកម្ពុជា ស្វែងយល់ពីការធ្វើសាមញ្ញកម្មនីតិវិធីគយក្នុងកិច្ចសម្រួលពាណិជ្ជកម្ម ដើម្បីដោះស្រាយបញ្ហាមិនប្រក្រតី និងធ្វើឱ្យប្រសើរឡើងនូវបរិយាកាសធុរកិច្ច ពិសេសការវិនិយោគនៅកម្ពុជា។

ក្នុងសិក្ខាសាលាដែលរៀបចំដោយសភាពាណិជ្ជកម្មអាម៉េរិកប្រចាំកម្ពុជាក្រោមប្រធានបទ «ចក្ខុវិស័យឆ្នាំ ២០២៤-២០២៨ និងបច្ចុប្បន្នភាពនៃវិស័យគយនិងរដ្ឋាករនៅកម្ពុជា» ឯកឧត្តមបណ្ឌិត គុណ ញឹម ក៏បានស្នើឱ្យសមាជិកសភាពាណិជ្ជកម្មអាម៉េរិកប្រចាំកម្ពុជា ចាប់យកនូវអត្ថប្រយោជន៍ពីកញ្ចប់លើកទឹកចិត្តនានាដែលមានអនុលោមភាពខ្ពស់ និងត្រូវបំពេញកាតព្វកិច្ចដែលមានចែងក្នុងច្បាប់និងបទប្បញ្ញត្តិជាធរមាន។ ឯកឧត្តមបណ្ឌិតអគ្គនាយកដ្ឋានគយ បានជំរុញសភាពាណិជ្ជកម្មអាម៉េរិកចូលរួមយន្តការភាពជាដៃគូគយ-ផ្នែកឯកជនដែលផងដែរ។

សិក្ខាសាលាដែលរៀបចំនាថ្ងៃទីទី២៨ ខែសីហា ឆ្នាំ២០២៤ នៅសណ្ឋាគារ Rosewood Phnom Penh លោក Casey Barnett ប្រធានសភាពាណិជ្ជកម្មអាម៉េរិកប្រចាំនៅកម្ពុជា បានលើកឡើងថា ការរៀបចំវេទិកាពិភាក្សារវាងរដ្ឋបាលគយកម្ពុជា និងធុរជន-វិនិយោគិនអាម៉េរិក ធ្វើឡើងដើម្បីធានាអនុលោមភាពនៃការអនុវត្តនីតិវិធី និងចូលរួមចំណែកដល់ការកៀរគរចំណូលដែលអគ្គនាយកដ្ឋានគយ ផ្ដល់កិច្ចសម្រួលពាណិជ្ជកម្មអន្តរជាតិរវាងកម្ពុជានិងអាម៉េរិក។ លោក Casey Barnett បានបន្ថែមថា វេទិការនេះ ក៏ដើម្បីទាក់ទាញវិនិយោគិនរបស់អាម៉េរិកបន្ថែមទៀតមកកម្ពុជា ស្របពេលដែលអាម៉េរិក គឺជាទីផ្សារនាំចេញចម្បងរបស់ផលិតផលកម្ពុជា៕