ភ្នំពេញ៖ រដ្ឋមន្ត្រីពាណិជ្ជកម្មលោកជំទាវ ចម និម្មល ជំរុញដល់សមាគមអ្នកផលិត អ្នកនាំចេញ និងអ្នកពាក់ព័ន្ធ ក្នុងវិស័យសំបុកត្រចៀកកាំកម្ពុជា បន្តសហការជាមួយពាណិជ្ជករផ្គត់ផ្គង់សំបុកត្រចៀកកាំធំៗនៅក្រៅប្រទេសដូចជា ឥណ្ឌូនេស៊ី ម៉ាឡេស៊ី និងថៃ ជាដើម។ ទន្ទឹមនឹងនេះ លោកជំទាវរដ្ឋមន្ត្រី ប្រាប់ដល់អ្នកផលិតនិងគ្រប់ភាគីពាក់ព័ន្ធ បន្តពង្រឹងគុណភាព បង្កើនបរិមាណផលិត ការធានាបាននូវសិ្ថរភាពនៃការផ្តត់ផ្តង់ និងការបំពេញបានតាមលក្ខខណ្ឌ និងនីតិវិធីតម្រូវនានាសម្រាប់ការនាំចេញទៅទីផ្សារអន្តរជាតិ។

ថ្លែងក្នុងពិធីបិទ"វេទិកាធុរកិច្ចសំបុកត្រចៀកកាំកម្ពុជា - Cambodia Bird's Nest Business Forum" និងបើក "កម្មវិធីរាត្រីសមោសរត្រចៀកកាំកម្ពុជា ឆ្នាំ២០២៣" នៅថ្ងៃទី២៥ តុលានេះ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ថា វេទិកានេះជាឱកាសសម្រាប់អាជីវករ និងពាណិជ្ជករជាតិ-អន្តរជាតិ កសាងទំនាក់ទំនង និងពង្រីកការធ្វើពាណិជ្ជកម្មលើវិស័យត្រចៀកកាំប្រកបដោយទំនុកចិត្ត និងបង្កលក្ខណៈឱ្យមានការផ្លាស់ប្តូរយោបល់ ក្នុងការពង្រឹងវិស័យជួញដូរសំបុកត្រចៀកកាំកើនឡើងមួយកម្រិតទៀត។

ក្នុងវេទិកាដែលរៀបចំដោយសមាគមអ្នកផលិត និងនាំចេញសំបុកត្រចៀកកាំកម្ពុជានេះ មានការចូលរួមពីសមាគមត្រចៀកកាំមកពីប្រទេសថៃ វៀតណាម ម៉ាឡេស៊ី និងចិនផងដែរ។ គោលបំណងនៃវេទិកានេះ គឺជំរុញការនាំចេញសំបុកត្រចៀកកាំកម្ពុជាតាមរយៈពង្រឹងនិងពង្រីកកិច្ចសហប្រតិបត្តិការពាណិជ្ជកម្ម ស្វែងរកដៃគូអាជីវកម្ម និងបង្កើនការនាំចេញសំបុកត្រចៀកកាំកម្ពុជា ទៅកាន់ទីផ្សារអន្តរជាតិ៕