ភ្នំពេញ៖ ក្រសួងសុខាភិបាល បានសម្រេចបិទមជ្ឈមណ្ឌលកែសម្ផស្ស មជ្ឈមណ្ឌលថែរក្សាសម្ផស្ស និងគ្លីនិកថែរក្សាសម្ផស្សចំនួន ៦ទីតាំងផ្សេងគ្នា ដែលបើកដំណើរការដោយគ្មានលិខិតអនុញ្ញាតពីក្រសួងសុខាភិបាល និងបានផ្សព្វផ្សាយចែកចាយ លក់ឱសថ និងផលិតផលគ្មានបញ្ចីកាពីក្រសួងសុខាភិបាល។ នេះបើតាមការចុះផ្សាយរបស់ក្រសួងសុខាភិបាល នាថ្ងៃទី១៩ ខែសីហា ឆ្នាំ២០២៤។

មជ្ឈមណ្ឌល និងគ្លីនិកកែសម្ផស្ស ៦ទីតាំងផ្សេងៗគ្នា ដែលជារបស់លោក វេជ្ជបណ្ឌិត សែម រតនា រួមមាន៖ (១)មជ្ឈមណ្ឌលថែរក្សាសម្ផស្ស ឌីអ ប្រឺហ្វេសិនណល ស្ថិតនៅផ្លូវលេខ១០៤ ភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង និង(២) គ្លីនិកកែសម្ផស្សឌីអ ប្រឺហ្វេសិនណល តាខ្មៅ ដែលមានទីតាំងស្ថិតនៅផ្ទះលេខ៨៤ ផ្លូវ២១០ ភូមិថ្មី១ សង្កាត់តាខ្មៅ ក្រុងតាខ្មៅ ខេត្តកណ្តាល។ (៣)មជ្ឈមណ្ឌលថែរក្សាសម្រស់ ឌីអ ប្រឺហ្វេសិនណល ស្ថិតនៅផ្ទះលេខ១១១ ផ្លូវលេខ១៥៥ សង្កាត់ទួលទំពូងទី១ ខណ្ឌចំការមន រាជធានីភ្នំពេញ។

(៤)គ្លីនិក កែសម្ផស្ស ឌីអ ប្រឺហ្វេសិនណល សៀមរាប ស្ថិតនៅផ្លូវជាតិលេខ៦A ភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប (៥)មជ្ឈមណ្ឌលកែសម្ផស្ស ឌីអ ប្រឺហ្វេសិនណល ខេត្តព្រះសីហនុ មានទីតាំងនៅផ្សារទំនើប FURI ផ្លូវឯករាជ្យ ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ។ ចំពោះទីតាំង(៦) គឺ មជ្ឈមណ្ឌលថែរក្សាសម្ផស្ស យីហោ ឌីអ ប្រូហ្វេសិនណល ឯ.ក មានទីតាំងស្ថិតនៅផ្ទះលេខ៦៨ ផ្លូវសុរិយាវរ្ម័ន ភូមិទី១ សង្កាត់វាលវង់ ក្រុងកំពង់ចាម ខេត្តកំពង់ចាម។

ក្រសួងសុខាភិបាល តម្រូវឱ្យប្រធានការិយាល័យនិយ័តកម្មសុខាភិបាល និងម្ចាស់ទីតាំងគ្លីនិកនិងមជ្ឈមណ្ឌលថែរក្សាសម្ផស្សទាំង ៦កន្លែង មានឈ្មោះ សែម រតនា ដូចខាងលើ ទទួលភារៈកិច្ចអនុវត្តតាមសេក្តីសម្រេចចាប់ពីចុះហត្ថលេខានេះតទៅ៕