ភ្នំពេញ៖ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លើកទឹកចិត្តឱ្យមា្ចស់រោងចក្រកែច្នៃដំណាប់ស្វាយ Sengda Cambodia Exchange ពង្រីកខ្សែច្រវាក់ផលិតកម្ម និងទាក់ទាញវិនិយោគិនមកបង្កើតរោងចក្របន្ថែមទៀត ដើម្បីផ្តល់ទីផ្សារដល់កសិករដាំស្វាយ តាមរយៈការកែច្នៃស្វាយកែវរមៀតសម្រាប់នាំចេញ និងចូលរួមគាំទ្រដល់កំណើនសេដ្ឋកិច្ច។

រោងចក្រកែច្នៃដំណាប់ស្វាយ ដែលមានទីតាំងនៅឃុំអូរបាក់រទេះ ស្រុកកំពង់សីលា ខេត្តព្រះសីហនុ នេះ មានសមត្ថភាពទទួលកែច្នៃស្វាយកែវរមៀតចំនួន ១០០តោន ក្នុងមួយថ្ងៃ និងមានទីផ្សានាំចេញទៅកាន់ទីប្រទេសចិន។ រោងចក្រនេះ បានផ្តល់ការងារដល់ពលរដ្ឋខ្មែរចំនួន ៤០០នាក់ ដែលទទួលបានប្រាក់ខែចន្លោះពី ២៨០ដុល្លារ ដល់ជិត ៤០០ដុល្លារ។ បច្ចុប្បន្ន រោងចក្រកំពុងត្រូវការកម្មករចំនួន ២០០-៣០០ នាក់បន្ថែម ដោយលើកទឹកចិត្តឱ្យកម្មករនៅទីនេះជួយប្រមែប្រមូលបងប្អូន សាច់ញាតិដែលមិនទាន់មានការងារធ្វើនៅតាមបណ្តាខេត្តផ្សេង មកធ្វើការនៅក្នុងរោងចក្រនេះ ដោយក្នុងនោះទទួលបានកន្លែងស្នាក់នៅ និងអាហារផងដែរ។

នាឱកាសចុះពិនិត្យរោងចក្រខាងលើដោយផ្ទាល់របស់ ឯកឧត្តម គង់ ចាន់វាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជាមួយលោកអភិបាលរងស្រុកកំពង់សីលា និងប្រធានមន្ទីកសិកម្មខេត្ត បងប្អូនកម្មករ បានបង្ហាញពីក្តីរីករាយ និងអរគុណចំពោះរាជរដ្ឋាភិបាលដែលបង្កលក្ខណៈឱ្យក្រុមហ៊ុនមកបោះទុនវិនិយោគផ្តល់ការងារធ្វើ និងប្រាក់ខែសមរម្យសម្រាប់ចិញ្ចឹមជីវភាព និងរស់នៅជួបជុំក្រុមគ្រួសារ។ នេះបើតាមការចុះផ្សាយរបស់ក្រសួងកសិកម្ម នាថ្ងៃទី២៨ ខែមីនា ឆ្នាំ២០២៥៕