ភ្នំពេញ៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងថា វិស័យដែលមានសក្តានុពលវិជ្ជមាននៅកម្ពុជា មានជាអាទិ៍ដូចជា៖ ស្ថិរភាពនយោបាយ, ស្ថានភាពម៉ាក្រូសេដ្ឋកិច្ចដែលមានលំនឹង, កម្លាំងពលកម្មវ័យក្មេងប្រកបដោយថាមវន្ត, ការរីកលូតលាស់នៃធុរកិច្ច, របបវិនិយោគដែលមានភាពទាក់ទាញ និងអនុគ្រោះ និងហេដ្ឋារចនាសម្ព័ន្ធអន្តរមធ្យោបាយ។

ក្នុងពិធីពិសាអាហារធុរកិច្ច ដែលរៀបចំឡើងដោយភាគីហុងកុង ក្រោមមូលបទ«ការតភ្ជាប់ដ៏អស្ចារ្យតាមមាគ៌ាថ្មីឆ្ពោះទៅភាពជោគជ័យ៖ ភាពជាដៃគូរវាងហុងកុង-កម្ពុជា ក្នុងការជំរុញវិបុលភាព និងការអភិវឌ្ឍសេដ្ឋកិច្ចរួមគ្នា» ក៏បានផ្លាស់ប្តូរអនុស្សារណៈនៃការយោគយល់គ្នាសរុបចំនួន១១ រវាងក្រសួង-ស្ថាប័ន និងវិស័យឯកជន។ ការផ្លាស់ប្តូរអនុស្សារណៈនៃការយោគយល់គ្នាសរុបចំនួន១១នេះ គឺមានវិសាលភាពគ្របដណ្តប់លើការងារសហប្រតិបត្តិការវិនិយោគ, ពាណិជ្ជកម្ម, ហេដ្ឋារចនាសម្ព័ន្ធ, អប់រំ, ហិរញ្ញវត្ថុ, ការតភ្ជាប់, និងអាកាសចរណ៍ស៊ីវិល។

ឯកឧត្តម ស៊ុន ចាន់ថុល ក៏បានបញ្ជាក់ថា វិនិយោគិនហុងកុងដែលបានចូលរួម នឹងសិក្សាពីការវិនិយោគនៅកម្ពុជា លើវិស័យដែលមានសក្តានុពល ព្រមទាំងជួយពាំនាំបរិយាកាសវិនិយោគនៃកម្ពុជាទៅកាន់សហគមន៍ធុរកិច្ចរបស់ខ្លួនឱ្យកាន់តែទូលំទូលាយបន្ថែមមួយកម្រិតទៀត៕