ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងក្រសួងប្រៃសណីយ៍ និងទូរគមនាគមន៍ បានចុះអនុស្សរណៈនៃការយោគយល់គ្នា (MOU) ស្តីពីកិច្ចសហប្រតិបត្តិការដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh ការរៀបចំហេដ្ឋារចនាសម្ព័ន្ធ និងការតភ្ជាប់អ៊ីនធឺណិត និងការបណ្តុះបណ្តាលជំនាញឌីជីថលជូនមន្ត្រីរាជការ ដើម្បីបង្កើនសុវត្ថិភាពឌីជីថល និងភាពងាយស្រួល។ នេះបើតាមការចុះផ្សាយរបស់ក្រសួងឧស្សាហកម្ម នាថ្ងៃទី០៨ ខែកក្កដា ឆ្នាំ២០២៤។

ការចុះ MOU រវាងឯកឧត្តម ជា វ៉ាន់ដេត និងឯកឧត្តម ហែម វណ្ណឌីនេះ ក្រសួងប្រៃសណីយ៍ និងទូរគមនាគមន៍ នឹងគាំទ្រដល់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលដាក់ឱ្យប្រើថ្នាលផ្ទៀងផ្ទាត់ឯកសារ verify.gov.kh, រៀបចំហេដ្ឋារចនាសម្ព័ន្ធ និងការតភ្ជាប់អ៊ីនធឺណិត និងផ្តល់ការបណ្តុះបណ្តាលជំនាញឌីជីថល ស្របតាមគោលនយោបាយរដ្ឋាភិបាលឌីជីថលឆ្នាំ២០២២-២០៣៥។

ក្រសួងឧស្សាហកម្ម បានឱ្យដឹងថា ថ្នាលផ្ទៀងផ្ទាត់ឯកសារ verify.gov.khនេះ នឹងដាក់បញ្ចូល QR Code ស្តង់ដារលើឯកសារនានាក្នុងវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងគោលដៅលុបបំបាត់ការក្លែងបន្លំឯកសារ លើកកម្ពស់ការអភិវឌ្ឍថ្នាល និងសេវារដ្ឋាភិបាលឌីជីថល៕