ភ្នំពេញ៖ ព្រះបាទសម្តេច ព្រះបរមនាថ នរោត្តម សីហមុនី នឹងយាងជាព្រះរាជាធិបតី ក្នុងពិធីបុណ្យរុក្ខទិវាជាតិ នៅខេត្តតាកែវ ដែលប្រារព្ធឡើងនៅថ្ងៃទី៩ ខែកក្កដា ឆ្នាំ២០២៤។ តាមការចុះផ្សាយរបស់ព្រះបរមរាជវាំង នាថ្ងៃទី០៨ ខែកក្កដា ឆ្នាំ២០២៤ ពិធីបុណ្យរុក្ខទិវាឆ្នាំ២០២៤នេះ ក្រសួងកសិកម្ម រុក្ខាប្រមាញ់ និងនេសាទ នឹងផ្តល់កូនឈើចំនួន ៩,៩៩៩ដើម សម្រាប់សាធារណជនដាំ ដើម្បីជួយស្តារឡើងវិញនូវផ្ទៃដី៣០ហិកតា។

ពិធីបុណ្យរុក្ខទិវាជាតិនេះ នឹងធ្វើឡើងនៅតំបន់ស្ដារព្រៃឈើបន្ទាយអង្គរ ដែលស្ថិតនៅភូមិខ្នារ ឃុំលាយបូរ ស្រុកត្រាំកក់ ខេត្តតាកែវ។ ព្រឹត្តិការណ៍នេះ ប្រារព្ធឡើងនៅថ្ងៃទី៩ ខែកក្កដា ជារៀងរាល់ឆ្នាំ និងជាកម្មវិធីប្រពៃណីដ៏យូរអង្វែងមួយក្នុងការលើកកម្ពស់ការដាំដើមឈើ និងការយល់ដឹងអំពីការអភិរក្សព្រៃឈើ។

ទិវារុក្ខទិវាជាតិនេះ ត្រូវបានប្រារព្ធឡើងតាំងពីទសវត្សរ៍ឆ្នាំ ១៩៥០មក ដែលដឹកនាំដោយព្រះមហាក្សត្រ ឬតំណាងរាជវង្ស។ ជាមួយគ្នានេះ ទិវារុក្ខទិវាជាតិ បានដើរតួនាទីយ៉ាងសំខាន់ក្នុងការលើកកម្ពស់និរន្តរភាពបរិស្ថាន និងការដឹងគុណចំពោះបេតិកភណ្ឌធម្មជាតិរបស់ប្រទេសកម្ពុជា នៅពេលដែលប្រទេសកម្ពុជាមានការអភិវឌ្ឍន៍។ គួរបញ្ជាក់ថា ខេត្តតាកែវ ធ្លាប់ធ្វើជាម្ចាស់ផ្ទះព្រឹត្តិការណ៍ថ្នាក់ជាតិនេះ ចំនួន៣លើកមកហើយ តាំងពីឆ្នាំ១៩៩៣, ២០០៨ និង២០១៤៕