ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ និងអង្គការស្បៀង និងកសិកម្មនៃសហប្រជាជាតិ(FAO) បានពិនិត្យលទ្ធភាពសហការផ្សព្វផ្សាយ និងទំនាក់ទំនងសាធារណៈ ដោយក្នុងនោះការផលិតផតខាស់ (Podcast) ផ្សព្វផ្សាយវិស័យកសិកម្មជាកិច្ចការអាទិភាព។ នេះបើតាមការចុះផ្សាយរបស់ក្រសួងកសិកម្ម កាលពីថ្ងៃទី២០ ខែសីហា ឆ្នាំ២០២៤។

ក្នុងជំនួបរវាងលោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម និងលោក Ehsan Kabir មន្រ្តីជំនាញផ្នែកទំនាក់ទំនង នៃអង្គការ FAO ក៏បានពិភាក្សាពីកិច្ចសហការផ្តោតលើការផ្សព្វផ្សាយអភិក្រមសុខភាពតែមួយដល់សាធារណជនតាមរយៈអ្នកសារព័ត៌មាន និងការរៀបចំសិក្ខាសាលាសម្រាប់អ្នកសារព័ត៌មានអំពីការគ្រប់គ្រងជលផលសមុទ្រប្រកបដោយនិរន្តរភាព។ ពាក់ព័ន្ធនឹងការផលិត Podcast លោកជំទាវ អ៊ឹម រចនា បានណែនាំដល់មន្រ្តីជំនាញនៃអង្គការ FAO ឱ្យកំណត់យកប្រធានបទជាក់លាក់ ជាការងារអាទិភាព។

លោកជំទាវអនុរដ្ឋលេខាធិការក្រសួងកសិកម្ម ក៏បានផ្ដល់យោបល់មួយចំនួនដល់អង្គការ FAO ដើម្បីពិនិត្យ និងកែសម្រួលឯកសារទស្សនទាន នៃការរៀបចំសិក្ខាសាលា ផ្សព្វផ្សាយអភិក្រមសុខភាពតែមួយដល់សាធារណជន ក៏ដូចជាសិក្ខាសាលាផ្សព្វផ្សាយគម្រោងបច្ចេកទេសកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន ដែលគ្រោងរៀបចំក្នុងខែកញ្ញា និងខែតុលា ឆ្នាំ២០២៤ខាងមុខ។

លោកជំទាវ អ៊ឹម រចនា និងអង្គការ FOA នឹងជួបគ្នាម្តងទៀតដើម្បីពិភាក្សាលម្អិតពីគម្រោងនីមួយៗ មុនពេលអនុវត្តការងាររួមគ្នាជាផ្លូវការ ដើម្បីបង្កើនចំណេះដឹងដល់អ្នកសារព័ត៌មានពីវិស័យកសិកម្ម និងសុខភាពចំណីអាហារ ក្នុងគោលដៅបញ្ជូនសារត្រឹមត្រូវ និងផ្ដល់ប្រយោជន៍ទៅកាន់សាធារណជន៕