ភ្នំពេញ៖ វិស័យសហគ្រាសធុនមីក្រូ តូច និងមធ្យម (MSMEs) បានគ្របដណ្តប់សកម្មភាពសេដ្ឋកិច្ចគ្រប់ប្រភេទ និងបានបង្កើនប្រាក់ចំណូលដល់ពលរដ្ឋ តាមរយៈការងារ មុខរបរ កាត់បន្ថយចំណាកស្រុកជួយប្រជាជនងាយរងគ្រោះឱ្យមានលំនឹងជីវភាព។ នេះជាប្រសាសន៍របស់សម្តេចធិបតីនាយករដ្ឋមន្រ្តី ហ៊ុន ម៉ាណែត លើកឡើងកាលពីថ្ងៃទី២៥ ខែមិថុនា ឆ្នាំ២០២៤។

សម្តេចធិបតី ហ៊ុន ម៉ាណែត បានបន្តថា វិស័យ MSMEs បានជំរុញការអភិវឌ្ឍសេដ្ឋកិច្ច ស្ថិរភាពសង្គម និងរួមចំណែកដល់ការរីកចម្រើននៃវិស័យឯកជនផងដែរ។ ដោយមើលឃើញអំពីសារសំខាន់របស់ MSMEs សារលិខិតរបស់ប្រមុខរាជរដ្ឋាភិបាល បញ្ជាក់ថា រាជរដ្ឋាភិបាលបន្តអនុវត្តគោលនយោបាយ ផែនការយុទ្ធសាស្ត្រអភិវឌ្ឍន៍វិស័យ MSMEs និងបានដាក់ចេញនូវយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធ។ ផែនការយុទ្ធសាស្ត្ររបស់រាជរដ្ឋាភិបាលនេះ គឺក្នុងគោលបំណងលើកកម្ពស់គាំពារ និងពង្រឹងសមត្ថភាព ផលិតភាព និងភាពធន់នៃសេដ្ឋកិច្ចក្រៅប្រព័ន្ធ ព្រមទាំងជំរុញនិងពន្លឿនការចូលរួមទៅក្នុងសេដ្ឋកិច្ចក្នុងប្រព័ន្ធ ដើម្បីធានាឱ្យបាននូវភាពធន់ ភាពប៉ាន់ប្រមាណបាន និងភាពរីកចម្រើនទៅមុខនៃការធ្វើធុរកិច្ច ពាណិជ្ជកម្ម វិនិយោគ និងការប្រកបអាជីវកម្ម មុខរបរ និងការងារចិញ្ចឹមជីវិតនៅកម្ពុជា។

សារលិខិត ក្នុងឱកាសប្រារព្ធទិវាជាតិសហគ្រាសធុនមីក្រូ តូច និងមធ្យម លើកទី១ ថ្ងៃទី២៧ ខែមិថុនា ឆ្នាំ២០២៤ សម្តេចធិបតី ហ៊ុន ម៉ាណែត បានមានប្រសាសន៍បន្ថែមថា MSMEs កំពុងដើរតួនាទីយ៉ាងសំខាន់ក្នុងការផលិត ផ្គត់ផ្គង់ និងការផ្តល់សេវា ព្រមទាំងអភិវឌ្ឍន៍និងវិវត្តខ្លួនឆ្លើយតបទៅនឹងនិន្នាការថ្មីៗ ពិសេសរបត់នៃការប្រែប្រួលផ្នែកលក្ខខណ្ឌតម្រូវរបស់ទីផ្សារ បរិស្ថាន និងការវិវត្តនៃបច្ចេកវិទ្យា។ ការរួមចំណែកក្នុងវិស័យផ្សេងៗរបស់MSMEs នេះ ទោះបីក្នុងពេលដែល MSMEs កំពុងប្រឈមក្នុងបរិការណ៍ប្រកួតប្រជែងនៃការធ្វើពាណិជ្ជកម្មសេរីក្នុងក្របខ័ណ្ឌតំបន់និងសកល ក៏ដូចជាភាពមិនប្រាកដប្រជានៃសេដ្ឋកិច្ចពិភពលោកក៏ដោយ៕