ភ្នំពេញ៖ លោកជំទាវ ឌិត នីតា ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា មានលើកឡើងថា ត្រឹមដំណាច់ត្រីមាសទី១ ឆ្នាំ២០២៤ វិស័យមីក្រូហិរញ្ញវត្ថុនៅកម្ពុជា បានគាំទ្រប្រជាពលរដ្ឋចំនួន ១,៥៥លាននាក់ និងបានផ្តល់ឥណទានចំនួន ៥,១៦ពាន់លានដុល្លារ លើគ្រប់វិស័យនៃខឿនសេដ្ឋកិច្ចជាតិ។

ក្នុងចំនួនប្រជាពលរដ្ឋ ១,៥៥លាននាក់ មានប្រជាជនប្រមាណ ៦៥% រស់នៅខេត្តរតនគីរី ដែលទទួលបានសេវាហិរញ្ញវត្ថុពីគ្រឹះស្ថានហិរញ្ញវត្ថុផ្លូវការ លទ្ធផលនេះ បានបញ្ជាក់ពីវិសាលភាព នៃការផ្តល់សេវាហិរញ្ញវត្ថុផ្លូវការដល់ទីជនបទដាច់ស្រយាល និងជនជាតិភាគតិច។ នេះជាការលើកឡើងបន្ថែមរបស់លោកជំទាវ ឌិត នីតា ក្នុងសិក្ខាសាលាថ្នាក់ខេត្តស្តីពី៖ «ការផ្សព្វផ្សាយសេវាធនាគារ និងហិរញ្ញវត្ថុផ្លូវការប្រកបដោយទំនួលខុសត្រូវ និងកិច្ចការពារអតិថិជន»។

ក្នុងសេចក្តីប្រកាសព័ត៌មាន របស់សមាគមធនាគារនៅកម្ពុជា កាលពីថ្ងៃទី១៣ ខែឧសភា ឆ្នាំ២០២៤ បានឱ្យដឹងថា សមិទ្ធផលទាំងនេះ បានបង្ហាញពីការបន្តរក្សាបានកំណើន និងស្ថិរភាព ក្នុងវិស័យមីក្រូហិរញ្ញវត្ថុនៅកម្ពុជា តាមរយៈការផ្តល់សេវាប្រកបដោយបរិយាបន្ន ជាមួយស្មារតីទទួលខុសត្រូវ និងកិច្ចការពារអតិថិជន ស្របតាមយុទ្ធសាស្ត្រជាតិស្តីពីបរិយាបន្នហិរញ្ញវត្ថុឆ្នាំ២០១៩-២០២៥។

គួរជម្រាបថា សិក្ខាសាលា ដែលរៀបចំឡើងលើកទី១ នៅស្រុកអូរជុំ ខេត្តរតនគិរី កាលពីថ្ងៃទី០៨ ខែឧសភា ឆ្នាំ២០២៤ ធ្វើឡើងក្នុងគោលបំណងផ្សព្វផ្សាយពីបច្ចុប្បន្នភាព, ទិសដៅនៃការផ្តល់សេវាហិរញ្ញវត្ថុផ្លូវការ, ពិគ្រោះយោបល់លើបញ្ហាប្រឈម សំណូមពរ និងដំណោះស្រាយ ដើម្បីពង្រឹងប្រសិទ្ធភាពការផ្តល់ និងទទួលសេវាហិរញ្ញវត្ថុផ្លូវការ និងចូលរួមទប់ស្កាត់ការផ្តល់កម្ចីក្រៅផ្លូវការ រួមទាំងបញ្ជ្រាបការយល់ដឹងពីអត្ថប្រយោជន៍នៃការប្រើប្រាស់សេវាហិរញ្ញវត្ថុដល់ប្រជាពលរដ្ឋ និងអាជ្ញាធរមូលដ្ឋាន៕