ភ្នំពេញ៖ វេទិកាធុរកិច្ចកម្ពុជា-សិង្ហបុរី នឹងផ្តល់ការពង្រឹង និងពង្រីកនូវកិច្ចសហប្រតិបត្តិការសេដ្ឋកិច្ច។ បើតាមការចុះផ្សាយរបស់ក្រុមប្រឹក្សាអភិវឌ្ឍន៍កម្ពុជា នាថ្ងៃទី១៩ ខែមិថុនា ឆ្នាំ២០២៤ វេទិកាធុរកិច្ចកម្ពុជា-សិង្ហបុរី គឺសំដៅទៅលើការបង្កើននូវរំហូរវិនិយោគ និងទំហំពាណិជ្ជកម្មលើគ្រប់វិស័យដែលផ្តល់អត្ថប្រយោជន៍ទៅវិញទៅមករវាងប្រទេសទាំងពីរ។

ក្នុងវេទិកាធុរកិច្ចកម្ពុជា-សិង្ហបុរី ដែលប្រព្រឹត្តនៅសាធារណរដ្ឋសិង្ហបុរីនេះ ឯកឧត្តម សួន សុផល អគ្គលេខាធិការរងគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានលើកឡើងអំពីបរិយាកាសវិនិយោគប្រកបដោយភាពអំណោយផល, គោលការណ៍ច្បាប់ និងបទប្បញ្ញត្តិពាក់ព័ន្ធនឹងវិនិយោគនៅកម្ពុជា។ ឯកឧត្តម សួន សុផល ក៏បានសង្កត់ធ្ងន់ទៅលើគោលនយោបាយបើកចំហ និងទាក់ទាញចំពោះការវិនិយោគពីបរទេស តាមស្មារតីនៃច្បាប់ស្ដីពីវិនិយោគ គ្របដណ្តប់លើអភិក្រមផ្ដល់កិច្ចសម្រួល, កញ្ចប់លើកទឹកចិត្ត និងការថែទាំវិនិយោគ ដែលជាការប្ដេជ្ញាចិត្តយ៉ាងមុតមាំរបស់រដ្ឋាភិបាលកម្ពុជា។

ក្នុងវេទិកាធុរកិច្ចកម្ពុជា-សិង្ហបុរីនេះ ឯកឧត្តម សួន សុផល ក៏បានបញ្ជាក់អំពីសក្ដានុពលវិនិយោគសំខាន់ៗលើវិស័យអាទិភាពនៅកម្ពុជា ដល់វិនិយោគិនសិង្ហបុរីនិងកម្ពុជាសរុបប្រមាណ ៤០០រូប រួមមាន៖ វិស័យកសិ-ចំណីអាហារ, ឧស្សាហកម្ម, យានយន្ដនិងអេឡិចត្រូនិក, ទេសចរណ៍ និងការអភិវឌ្ឍបៃតងផងដែរ៕