ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ តែងតាំងតារាដ៏ល្បីល្បាញ ដែលជាតួសម្តែងជាព្រះពុទ្ធក្នុងរឿងរបស់ប្រទេសឥណ្ឌា លោក GANGAN Malik ជាទូតសុច្ឆន្ទៈទេសចរណ៍កម្ពុជា ដើម្បីជួយផ្សព្វផ្សាយសក្តានុពលទេសចរណ៍កម្ពុជា ទៅកាន់ប្រជាជនក្នុងពិភពលោក ជាពិសេសប្រជាពលរដ្ឋឥណ្ឌា។

ក្នុងជំនួបជាមួយ ឯកឧត្តម ហួត ហាក់ លោក GANGAN Malik បានស្នើសុំកិច្ចគំាទ្រពីក្រសួងទេសចរណ៍លើគម្រោងកញ្ចប់ទស្សនកិច្ចទេសចរណ៍បែបសាសនាពីបណ្តាប្រទេសនានា ពិសេសពីប្រទេសឥណ្ឌាមកប្រទេសកម្ពុជា នារដូវកាលបៃតង (Green Season) ខាងមុខ។

ពាក់ព័ន្ធនឹងការស្នើសុំនេះ ឯកឧត្តម ហួត ហាក់ បានសម្រេចផ្តល់ការគាំទ្រចំពោះគម្រោងកញ្ចប់ទស្សនកិច្ចថ្មីនេះ និងបានវាយតម្លៃខ្ពស់ចំពោះកិច្ចប្រឹងប្រែងផ្សព្វផ្សាយសក្តានុពលទេសចរណ៍កម្ពុជា កត្តាសុខសន្តិភាព ស្ថានភាពនយោបាយ សង្គម សណ្តាប់ធ្នាប់សាធារណៈ សុវត្ថិភាពទេសចរពិតនៅកម្ពុជា របស់លោក GANGAN Malik ទៀតផង។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី១៩ ខែមីនា ឆ្នាំ២០២៥៕