ភ្នំពេញ៖ កម្ពុជា មានគោលបំណងជំរុញការនាំចេញ និងនាំចូលផលិតផលទៅវិញទៅមក ជាមួយប្រទេសគុយបា។ នេះជាការលើកឡើងរបស់សម្តេចតេជោ ហ៊ុន សែន ប្រធានព្រឹទ្ធសភាក្នុងជំនួបជាមួយលោកជំទាវ មីឡេនណា ការីដាដ ហ្សាឌីវ៉ា ពាដ្រា ឯកអគ្គរដ្ឋទូតសាធារណរដ្ឋគុយបាប្រចាំកម្ពុជា។

សម្ដេចតេជោប្រធានព្រឹទ្ធសភា បានបញ្ជាក់ពីគម្រោងជួយប្រទេសគុយបា ក្នុងការផលិតស្រូវដើម្បីកាត់បន្ថយការនាំចូលយ៉ាងដូច្នេះថា៖«កម្ពុជាមានបទពិសោធក្នុងវិស័យកសិកម្ម ពិសេសការផលិតស្រូវ ដោយប្រើ រយៈពេលខ្លី ប្រើទឹកតិច ហេតុនេះគុយបា អាចយកបច្ចេកទេសផលិតស្រូវនេះ ទៅអនុវត្តនៅគុយបា ដើម្បីដោះស្រាយបញ្ហាខ្វះខាតស្បៀងដោយសារការទទួលរងនូវការហ៊ុមព័ទ្ធបាន»។

បើតាមការចុះផ្សាយរបស់សម្តេចតេជោ ហ៊ុន សែន នាថ្ងៃទី៥ ខែមិថុនា ឆ្នាំ២០២៤ លោកជំទាវ មីឡេនណា ការីដាដ ហ្សាឌីវ៉ា ពាដ្រា បានលើកឡើងថា បច្ចុប្បន្ន គុយបាមានការហ៊ុមព័ទ្ធទាំងផ្នែកសេដ្ឋកិច្ច និងហិរញ្ញវត្ថុ ដែលធ្វើឱ្យបានមានការលំបាកក្នុងការនាំចូលស្បៀង។ គុយបា បានចាត់ទុកគម្រោងផលិតស្រូវ គឺសារសំខាន់នៃទំនាក់ទំនងរវាងកម្ពុជា-គុយបា ដែលក្នុងនោះគណៈប្រតិភូប្រទេសទាំងពីរបានធ្វើដំណើរទស្សនកិច្ចទៅវិញទៅមក ដើម្បីជំរុញវិស័យផលិតស្រូវក្នុងប្រទេសគុយបា។

ចំណែកក្នុងវិស័យសុខាភិបាលវិញ គុយបាមានបច្ចេកវិទ្យាផ្នែកសុខាភិបាល ដូច្នេះកម្ពុជា-គុយបា គួរមានអនុស្សរណៈយោគយល់គ្នានៅលើវិស័យសុខាភិបាល និងវិស័យផ្សេងទៀតដូចជាវប្បធម៌ផងដែរ។ នេះជាការលើកឡើងបន្ថែម របស់ឯកអគ្គរដ្ឋទូតសាធារណរដ្ឋគុយបាប្រចាំកម្ពុជា៕