ភ្នំពេញ៖ ក្រុមហ៊ុន Sichuan Pan-Asia Investment Co., Ltd. ចង់វិនិយោគលើវិស័យកសិកម្ម និងកសិ-ឧស្សាហកម្មនៅកម្ពុជា ដោយក្នុងនោះក្រុមហ៊ុននឹងសិក្សាពីលទ្ធភាពវិនិយោគលើប្រភេទដំណាំសក្តានុពល ដូចជាការកែច្នៃស្វាយចន្ទី ម្រេច និងដំឡូងមី ដើម្បីនាំចេញទៅកាន់ទីផ្សារចិន។ ការវិនិយោគនាំចេញទៅទីផ្សារអន្តរជាតិនេះ ក្រុមហ៊ុនចិន នឹងសហការជាមួយក្រុមហ៊ុនក្នុងស្រុក Santana Agro Product Co., Ltd.។

ក្នុងជំនួបជាមួយ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៥ ខែកញ្ញា ឆ្នាំ២០២៤ គណៈប្រតិភូ នៃក្រុមហ៊ុនចិនខាងលើ បានបញ្ជាក់ថា ក្រុមហ៊ុននឹងសិក្សាពីលទ្ធភាពបង្កើតសួនឧស្សាហកម្មនៅតំបន់ជិតផ្លូវរថភ្លើង ព្រមទាំងលទ្ធភាពបង្កើតរោងចក្រផលិតជីនិងថ្នាំកសិកម្មនៅកម្ពុជាផងដែរ។

សូមជម្រាបថា បច្ចុប្បន្ន ក្រុមហ៊ុន Sichuan Pan-Asia Investment Co., Ltd. បាននិងកំពុងវិនិយោគវិស័យកសិកម្ម (ដំណាំដំឡូងមី) នៅប្រទេសឡាវ និងបានបង្កើតសួនឧស្សាហកម្មចំនួនមួយកន្លែងនៅក្នុងប្រទេសឡាវ និងមានក្រុមហ៊ុនបុត្រសម្ព័ន្ធនៅប្រទេសថៃ ឈ្មោះ Pan-asia Investment ដែលវិនិយោគលើការកែច្នៃម្សៅដំឡូងមី។ នេះបើតាមការចុះផ្សាយរបស់ក្រសួងកសិកម្ម កាលពីថ្ងៃទី២៥ ខែកញ្ញា ឆ្នាំ២០២៥៕