ភ្នំពេញ៖ កម្ពុជា រកចំណូលពីការលក់សំបុត្រជូនភ្ញៀវអន្តរជាតិចូលទស្សនារមណីយដ្ឋានអង្គរបាន ២ ២០៦ ៨៩១ដុល្លារ ក្នុងរយៈពេល ៥ខែ ឆ្នាំ២០២៤។ បើតាមសេចក្តីប្រកាសព័ត៌មានរបស់គ្រឹះស្ថានអង្គរ កាលពីថ្ងៃទី១ ខែមិថុនា ឆ្នាំ២០២៤ ចំនួននេះ កើនឡើង ៣៨,២២% ធៀបនឹងរយៈពេលដូចគ្នា ឆ្នាំ២០២៣។

សេចក្តីប្រកាសព័ត៌មាន ស្តីពីស្ថិតិភ្ញៀវបរទេស និងចំណូលដែលទទួលបានពីការលក់បណ្ណចូលទស្សនារមណីយដ្ឋានអង្គរ ប្រាសាទកោះកែរ និងកំពង់ផែចុងឃ្មៀស ប្រចាំខែឧសភា ឆ្នាំ២០២៤ បញ្ជាក់ថា រយៈពេល ៥ខែ រមណីយដ្ឋានអង្គរ ទទួលបានភ្ញៀវអន្តរជាតិសរុប ៤៧២ ២៥៨នាក់ កើនឡើង ៣៦,៩៨% ធៀបនឹងរយៈពេលដូចគ្នា ឆ្នាំ២០២៣។ ចំណែកឯ ការលក់បណ្ណនៅប្រាសាទកោះកែរ ក្នុងរយៈពេល ៥ខែនេះ ទទួលបានចំណូល ១៥១ ៩០៥ដុល្លារ ពីទេសចរអន្តរជាតិចំនួន ១០ ១២៧នាក់។

ការលក់សំបុត្រទូកវិញ គ្រឹះស្ថានអង្គរទទួលបានចំណូល ៤០០ ៣០២ដុល្លារ ដែលមានទូកសរុបចំនួន១៤ ០៧៣ ក្នុងនោះទូកតូចចំនួន ៩ ៤៣២, ទូកកណ្តាលចំនួន៤ ០៨៨ និងទូកធំចំនួន៥៥៣។ គួរជម្រាបថា ក្នុងខែឧសភា ឆ្នាំ២០២៤ មានភ្ញៀវបរទេសចូលទស្សនារមណីយដ្ឋានអង្គរមានចំនួន ៥០ ៨៧៩នាក់ កើនឡើង១១,១៩% ធៀបនឹងខែឧសភា ឆ្នាំ២០២៣ និងរកចំណូលបាន ២ ២៨៩ ៣៥៨ដុល្លារ កើនឡើង ១២,៥២% ធៀបនឹងខែឧសភា ឆ្នាំ២០២៣៕