ភ្នំពេញ៖ កម្ពុជា និងវៀតណាម នឹងរៀបចំវេទិកាចែករំលែកព័ត៌មាន និងព្រឹត្តិការណ៍ផ្គូផ្គងអាជីវកម្ម អំពីសក្តានុពលនៃការធ្វើពាណិជ្ជកម្មឆ្លងព្រំដែនជាមួយសហគ្រាសធុនតូច និងមធ្យម (SMEs) របស់វៀតណាម។ ទាក់ទងនឹងវេទិកានេះ KhmerSME លើកទឹកចិត្តឱ្យ SMEs ក្នុងវិស័យកសិកម្ម និងកសិពាណិជ្ជកម្មនៅកម្ពុជា ដែលចង់ធ្វើពាណិជ្ជកម្មជាមួយវៀតណាម ចុះឈ្មោះចូលរួមក្នុង «វេទិកាចែករំលែកព័ត៌មាន និងព្រឹត្តិការណ៍ផ្គូផ្គងអាជីវកម្ម»នេះ។

វេទិកាចែករំលែកព័ត៌មាន នឹងប្រព្រឹត្តឡើងតាមប្រព័ន្ធអនឡាញ នៅថ្ងៃទី២៧ មិថុនា ២០២៤។ ចំណែកព្រឹត្តិការណ៍ផ្គូផ្គងអាជីវកម្មវិញ នឹងធ្វើឡើងតាមប្រព័ន្ធអនឡាញនៅលើថ្នាល ASEAN Access MATCH (www.aseanaccess.com) នាខែតុលា។ ចំពោះផលិតផល និងសេវាកម្ម ដែលត្រូវបានកំណត់ជាពាណិជ្ជកម្មឆ្លងព្រំដែនដ៏មានសក្តានុពលសម្រាប់ SMEs នាំចេញទៅប្រទេសវៀតណាម រួមមាន៖ វេទិកាពាណិជ្ជកម្មអេឡិចត្រូនិក, ផលិតផលម្ហូបអាហារ, ផលិតផលកសិកម្ម, គ្រឿងសម្អាង សារធាតុចម្រាញ់ពីគ្រឿងសម្អាង ប្រេងសំខាន់ៗ និងតែរុក្ខជាតិ/គ្រឿងទេស និងសូត្រ និងផលិតផលធ្វើពីសូត្រ។

ចំពោះ ផលិតផលសក្តានុពល ដែលនាំចូលពីប្រទេសវៀតណាមវិញមានដូចជា ផលិតផលប្រើប្រាស់សម្រាប់កសិកម្ម និងបច្ចេកវិទ្យាកសិកម្ម, ម៉ាស៊ីន និងបច្ចេកវិទ្យាកែច្នៃអាហារ, ផលិតផល និងសេវាកម្មសុវត្ថិភាពចំណីអាហារ, គ្រឿងសម្អាង សារធាតុចម្រាញ់ពីគ្រឿងសម្អាង ប្រេងសំខាន់ៗ និងតែរុក្ខជាតិ/គ្រឿងទេស និងផលិតផលកសិកម្ម និងអាហារកែច្នៃ។ សម្រាប់តួអង្គក្នុងខ្សែច្រវាក់ផ្គត់ផ្គង់លើវិស័យកសិកម្ម ឬSMEs ឬសហករណ៍កសិកម្ម (ACs) ដែលមានបំណងចូលរួមក្នុងវេទិកាខាងលើ អាចចុះឈ្មោះតាមរយៈតំណភ្ជាប់ https://shorturl.at/0RQC5។

គួរបញ្ជាក់ថា «វេទិកាចែករំលែកព័ត៌មាន និងព្រឹត្តិការណ៍ផ្គូផ្គងអាជីវកម្ម» ធ្វើឡើងតាមរយៈគម្រោងក្នុងតំបន់របស់ទីភ្នាក់ងារកិច្ចសហប្រតិបត្តិការអាល្លឺម៉ង់ (GIZ) «ការពង្រឹងរចនាសម្ព័ន្ធសម្រាប់លើកកម្ពស់ សហគ្រាសធុនតូច និងមធ្យមនៅអាស៊ាន (ASEAN-SME)» សហការជាមួយដៃគូគម្រោងក្នុងប្រទេសកម្ពុជា និងវៀតណាម៕