ភ្នំពេញ៖ សភាពាណិជ្ជកម្មត្រកូលលីនពិភពលោក ស្វែងរកកាលានុវត្តភាពវិនិយោគលើវិស័យសំណង់ និងកសិកម្មនៅកម្ពុជា។ នេះជាការលើកឡើងរបស់គណៈប្រតិភូសភាពាណិជ្ជកម្មត្រកូលលីនពិភពលោក កាលពីថ្ងៃទី២៩ ខែឧសភា ឆ្នាំ២០២៤។

បន្ថែមពីការគ្រោងវិនិយោគលើវិស័យសំណង់ និងកសិកម្មនៅកម្ពុជា សភាពាណិជ្ជកម្មត្រកូលលីនពិភពលោក ក៏មានបំណងវិនិយោគលើថាមពលបៃតង សុខាភិបាល និងវិស័យមួយចំនួនទៀតផងដែរ។ ក្នុងកិច្ចពិភាក្សាការងារជាមួយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(CDC) គណៈប្រតិភូសភាពាណិជ្ជកម្មត្រកូលលីនពិភពលោក បានសង្ឃឹមថា នឹងមានវិនិយោគិនជាសមាជិករបស់ខ្លួនប្រមាណ ៥០០នាក់ ចូលរួមលើការរៀបចំឱ្យមានសិក្ខាសាលាអំពីកាលានុវត្តភាពវិនិយោគកម្ពុជា នៅទីស្ដីការ CDC ។

បើតាមការចុះផ្សាយរបស់ CDC នាថ្ងៃទី៣១ ឧសភា ឯកឧត្តមឧបនាយករដ្ឋមន្ត្រី បានមានប្រសាសន៍អំពីបរិយាកាសវិនិយោគនៅកម្ពុជា ពិសេសច្បាប់វិនិយោគដែលផ្តល់ភាពងាយស្រួលដល់វិនិយោគិន រួមមានការផ្ដល់ការលើកទឹកចិត្តក្នុងគម្រោង និងភាពបើកចំហរទទួលរាល់វិនិយោគិនពីគ្រប់បណ្ដាប្រទេស។ លើសពីនេះ រដ្ឋាភិបាលកម្ពុជា បានលើកទឹកចិត្តដល់វិនិយោគិន តាមរយៈការកសាងហេដ្ឋារចនាសម្ព័ន្ធគាំទ្រទាំងផ្លូវគោក ផ្លូវទឹក និងផ្លូវអាកាស៕