ភ្នំពេញ៖ ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) ស្នើឱ្យក្រុមហ៊ុន Glorank (HK) ពិនិត្យលទ្ធភាពវិនិយោគបង្កើតតំបន់សេដ្ឋកិច្ចពិសេសនៅកម្ពុជា ដោយផ្តោតលើការប្រមូលផ្តុំចង្កោមឧស្សាហកម្មក្នុងវិស័យផលិតទោចក្រយានយន្ត ដែលប្រើថាមពលអគ្គិសនី។ នេះបើតាមការចុះផ្សាយរបស់ CDC នាថ្ងៃទី១៣ ខែធ្នូ ឆ្នាំ២០២៤។

ក្នុងកិច្ចប្រជុំជាមួយឯកឧត្តម ជា វុទ្ធី លោក Wang Jiawei អគ្គនាយកក្រុមហ៊ុន Glorank (HK) និងជាគណៈប្រតិភូវិនិយោគិនចិន បានបង្ហាញបំណងស្វែងយល់ពីបរិយាកាស និងសក្តានុពលវិនិយោគនៅកម្ពុជា ពិសេសការវិនិយោគក្នុងវិស័យតម្លើងទោចក្រយានយន្តដែលប្រើថាមពលអគ្គិសនី ផលិតអាគុយ រួមទាំងឧស្សាហកម្ម។

ជាមួយគ្នានេះ ឯកឧត្តម ជា វុទ្ធី ក៏បានបញ្ជាក់អំពីអនុលោមតាមច្បាប់ និងបទប្បញ្ញត្តិពាក់ព័ន្ធនឹងការវិនិយោគ ដែលគម្រោងប្រភេទនេះជាគម្រោងដែលទទួលបានការលើកទឹកចិត្ត ជាពិសេសគាំទ្រដល់កិច្ចការពារបរិស្ថាន។ ឯកឧត្តម ជា វុទ្ធី ក៏បានលើកឡើងពីគោលនយោបាយរបស់រាជរដ្ឋាភិបាល ក៏ដូចជារបបលើកទឹកចិត្តសម្រាប់គម្រោងវិនិយោគផលិតទោចក្រយានយន្តដែលប្រើថាមពលអគ្គិសនី៕