ភ្នំពេញ៖ កម្ពុជា ស្នើក្រុមហ៊ុនជប៉ុនមកបណ្តាក់ទុនលើវិស័យអេឡិចត្រូនិក វិស័យយានយន្ត និងបច្ចេកវិទ្យា ដើម្បីប្រែក្លាយប្រទេសកម្ពុជាពីការប្រើប្រាស់កម្លាំងពលកម្ម ទៅជាការប្រើប្រាស់ជំនាញបច្ចេកទេសសម្រាប់វិស័យឧស្សាហកម្ម។ នេះជាការស្នើរបស់ឯកឧត្តមឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជាទៅកាន់លោក Tsuyosi Hasabe ប្រធានក្រុមហ៊ុន Nikkei Inc.។

ឯកឧត្តមឧបនាយករដ្ឋមន្ត្រី ស៊ុន ចាន់ថុល ក៏បានលើកឡើងពីការផ្តល់កិច្ចសម្របសម្រួលដល់វិនិយោគិន និងកត្តាអំណោយផលផ្សេងៗក្នុងការបណ្តាក់ទុនវិនិយោគនៅកម្ពុជា ដែលក្នុងនោះមានការអភិវឌ្ឍហេដ្ឋារចនាសម្ព័ន្ធ និងផែនការថ្មីៗជាច្រើន។ ការអភិវឌ្ឍហេដ្ឋារចនាសម្ព័ន្ធ និងផែនការថ្មីៗរបស់កម្ពុជានោះ រួមមាន៖ គម្រោងសាងសង់ចំណតផែកុងតឺន័រទឹកជ្រៅថ្មីជំហានទី១ ប្រវែង៣៥០ម៉ែត្រ, គម្រោងផ្លូវល្បឿនលឿនភ្នំពេញ-ក្រុងព្រះសីហនុ ការលើកកម្រិតផ្លូវជាតិលេខ៥ ពី២គន្លង ទៅ ៤គន្លង, គម្រោងសាងសង់ផ្លូវល្បឿនលឿនភ្នំពេញ-បាវិត, គម្រោងផែនការកសាងផ្លូវល្បឿនលឿនភ្នំពេញ-សៀមរាប-ប៉ោយប៉ែត និងគម្រោងព្រែកជីកហ្វូណនតេជោផងដែរ។

ជំនួបពិភាក្សាការងារ កាលពីថ្ងៃទី២៣ ខែឧសភា ឆ្នាំ២០២៤ ក្នុងសន្និសីទអន្តរជាតិលើកទី២៩ ស្ដីពី «អនាគតរបស់អាស៊ី» លោក Tsuyosi Hasabe បានបង្ហាញចំណាប់អារម្មណ៍លើការអភិវឌ្ឍយ៉ាងឆាប់រហ័សរបស់កម្ពុជា និងបានប្តេជ្ញាចិត្តជួយផ្សព្វផ្សាយ និងណែនាំក្រុមហ៊ុនជប៉ុនឱ្យបណ្តាក់ទុនវិនិយោគនៅប្រទេសកម្ពុជាបន្ថែមទៀត៕