ភ្នំពេញ៖ ឯកឧត្ដម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងគណៈប្រតិភូអូស្រ្តាលី បានពិភាក្សាអំពីគម្រោង និងឱកាសអភិវឌ្ឍន៍កសិកម្ម តាមរយៈការបង្កើតកសិ-ពាណិជ្ជកម្មខ្នាតធំដំបូងគេ ដោយធ្វើកសិកម្មឆ្លាតវៃ និងទំនើប ដើម្បីជំរុញកំណើនផលិតភាពរបស់ក្រុមហ៊ុន Agribusiness Asian Group (AAG) នៅខេត្តសៀមរាប។

គម្រោងកសិកម្មឆ្លាតវៃ និងទំនើបនេះ នឹងអនុវត្តលើផ្ទៃដីប្រហែល ១០០០ហិកតា ដោយដាំដុះដំណាំពោត និងកែច្នៃកាកសំណល់កសិកម្ម (ចង្រ្កានពោត) ទៅជាជីវធ្យូង ដើម្បីរក្សាទុកកាបូន ក្នុងរយៈពេល ៥ឆ្នាំ។ ក្នុងជំនួបពិភាក្សាកាលពីថ្ងៃទី២៣ ខែឧសភា ឆ្នាំ២០២៤ គណៈប្រតិភូអូស្រ្តាលី បានលើកឡើងថា AAG ដែលមានស្ថាបនិកជាជនជាតិអូស្រ្តាលី នឹងប្តេជ្ញាចិត្តស្រាវជ្រាវ និងវិនិយោគលើបច្ចេកវិទ្យា ដើម្បីប្រែក្លាយកាកសំណល់កសិកម្មដែលមិនត្រូវបានដុត ទៅជាជីវឧស្ម័នសំណល់ដំណាំ (ជីវម៉ាស)។

ជីវម៉ាសនេះ ត្រូវបានដុតនៅសីតុណ្ហភាព ៦០០អង្សាសេ ដើម្បីឈានដល់ជីវម៉ាសកម្រិតខ្ពស់ ហើយជីវឧស្ម័នទាំងនោះ នឹងចាប់យក និងរក្សាទុកកាបូនបានរហូតដល់ ១ ០០០ឆ្នាំ។ ចំណែក ជីវម៉ាសចុងក្រោយដែលទទួលបាន នឹងយកទៅប្រើលើដីដើម្បីធ្វើឱ្យប្រសើរឡើងនូវស្ថានភាពដី រួមមាន៖ ការបង្កើន pH ដី បរិយាកាសដី សមត្ថភាពផ្ទុកសារធាតុចិញ្ចឹម និងសកម្មភាពអតិសុខុមប្រាណក្នុងដី។ នេះជាការបញ្ជាក់បន្ថែមរបស់ ACC កាលពីថ្ងៃទី២៣ ឧសភា។

ឯកឧត្តម ប្រាក់ ដាវីដ ស្នើឱ្យ AAG សិក្សាបន្ថែម លើការប្រែក្លាយកាកសំណល់កសិកម្មលើដំណាំស្រូវ ពិសេសចំបើង និងដំណាំដទៃទៀត ដែលអាចជា Bio Recycle។ តាមរយៈការអនុវត្តលើដី ១ ០០០ហិកតា ក្នុងដំណាក់កាលដំបូងនេះ AAG អាចពិចារណាពង្រីកឱ្យកាន់តែធំជាងនេះបន្ថែមទៀត ករណីមានការសិក្សាលើសេដ្ឋកិច្ចច្បាស់លាស់ លើដំណាំពោតដែលអាចផ្តល់ប្រាក់ចំណេញខ្ពស់ជាងដំណាំផ្សេងៗ។

បើតាមការលើកឡើងរបស់ឯកឧត្តម ប្រាក់ ដាវីដ ក្រសួងកសិកម្ម នឹងពិចារណាសហការជាមួយ AAG ដោយផ្អែកលើគោលនយោបាយរបស់ក្រសួង តាមរយៈកសិកម្មបែបទំនើប បង្កើតនូវម៉ូឌែលអាជីវកម្មថ្មី ដើម្បីជួយដល់កសិកម្ម និងកសិកម្មបែបទំនើប និងកំណត់យកទីផ្សារឱ្យច្បាស់លាស់នូវផលចំណេញសេដ្ឋកិច្ច ក្នុងការជួយដល់ការអនុវត្តគម្រោងខាងលើ៕