ភ្នំពេញ៖ ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានលើកឡើងថា គម្រោងព្រែកជីកហ្វូណនតេជោ គឺជាសមិទ្ធផលប្រវត្តិសាស្ត្រថ្មីមួយរបស់កម្ពុជា ដែលនឹងផ្តល់ផលប្រយោជន៍យូរអង្វែងដល់កូនខ្មែរគ្រប់ជំនាន់។

ក្នុងវេទិកាសារព័ត៌មានលើកទី៣ កាលពីថ្ងៃទី២០ ខែឧសភា ឆ្នាំ២០២៤ ឯកឧត្តម ប៉ែន បូណា បានបន្តលើកឡើងថា ក្រៅពីការផ្តល់ប្រយោជន៍ដល់កូនខ្មែរគ្រប់ជំនាន់ គម្រោងព្រែកជីកហ្វូណនតេជោ ក៏នឹងជួយជំរុញសេដ្ឋកិច្ចកម្ពុជា រួមទាំងធ្វើឱ្យប្រទេសកម្ពុជា ធានាបាននូវឯករាជ្យភាពនយោបាយដឹកជញ្ជូនដោយមិនចាប់បាច់ពឹងផ្អែកលើប្រទេសដទៃ។

«គម្រោងព្រែកជីកហ្វូណនតេជោ» ដែលឈានទៅរកការបើកការដ្ឋានសាងសង់ឆាប់ៗនាពេលខាងមុខ មានសន្ទុះគាំទ្រយ៉ាងខ្លាំងពីសំណាក់ពលរដ្ឋនៅទូទាំងប្រទេសកម្ពុជា ហើយចលនាសាមគ្គីជាតិខ្មែរដ៏ធំធេងនេះ ជាចលនាមិនធ្លាប់មានពីមុនមក។ ឯកឧត្តម ប៉ែន បូណា ជឿជាក់ថា ប្រជាពលរដ្ឋខ្មែរនឹងបន្តគាំទ្រគម្រោងព្រែកជីកនេះរហូតចេញជារូបរាង សម្រាប់ប្រទេសជាតិនាថ្ងៃអនាគត៕