ភ្នំពេញ៖ គិតត្រឹមថ្ងៃទី១៩ ខែឧសភា ឆ្នាំ២០២៤ អាជីវកម្ម ដែលទទួលបានជោគជ័យលើការចុះបញ្ជីតាមថ្នាលបច្ចេកវិទ្យាព័ត៌មាន(CamDx) ដំណាក់កាលទី១ មានចំនួន ៣៦,១៥៩ក្រុមហ៊ុន និងមានដើមទុនសរុប ១០,៩៦ពាន់លានដុល្លារ។ នេះបើយោងតាម Online Business Registration Service (OBRS) ចេញផ្សាយនៅថ្ងៃទី២១ ឧសភា។

បើយោងតាម OBRS ដដែល បានបញ្ជាក់ថា អាជីវកម្មដែលមានដើមទុនវិនិយោគចុះបញ្ជីច្រើនជាងគេ រួមមាន៖ ការសាងសង់អាគារមានចំនួន ១,១៨ពាន់លានដុល្លារ ស្មើនឹង១០,៧២%, សកម្មភាពអចលនទ្រព្យមានទុនវិនិយោគ ១,១១ពាន់លានដុល្លារ ស្មើ ១០,១៥%, សកម្មភាពសេវាកម្មស្នាក់នៅមានទុន ១,០២ពាន់លានដុល្លារ ស្មើនឹង ៩,៣៤%, សកម្មភាពពិគ្រោះយោបល់ផ្នែកគ្រប់គ្រងមានទំហំវិនិយោគ ៦១៧លានដុល្លារ ត្រូវនឹង ៥,៦៣%, កម្មន្តសាលសម្លៀកបំពាក់ លើកលែងសម្លៀកបំពាក់ធ្វើពីរោមសត្វ មានទុនវិនិយោគ ៥៩៤លានដុល្លារ ស្មើនឹង ៥,៤២% និងផ្នែកផ្សេងៗចំនួន ៦,៤៤ពាន់លានដុល្លារ ស្មើនឹង៥៨,៧៥%។

គួរបញ្ជាក់ថា ចំនួនម្ចាស់ក្រុមហ៊ុន-សហគ្រាស ដែលបានចុះបញ្ជី ៣៦,១៥៩ក្រុមហ៊ុននេះ មានបុរសចំនួន ៦២% និងស្រ្តីចំនួន ៣៨%។ កាលពីថ្ងៃទី១២ ខែឧសភា ឆ្នាំ២០២៤ អាជីវកម្ម ដែលទទួលបានជោគជ័យលើការចុះបញ្ជីតាមថ្នាលបច្ចេកវិទ្យាព័ត៌មាន ដំណាក់កាលទី១ មានត្រឹមតែ ៣៥,៩៦៨ក្រុមហ៊ុន និងមានដើមទុនសរុប ១០,៩០ពាន់លានដុល្លារ៕