ភ្នំពេញ៖ សម្ដេចតេជោ ហ៊ុន សែន ប្រធានព្រឹទ្ធសភា បានអរគុណដល់សាធារណរដ្ឋឆែក ដែលបានលុបចោលបំណុល និងប្រែក្លាយបំណុលសេសសល់របស់កម្ពុជា ទៅជាជំនួយសម្រាប់ការអភិវឌ្ឍលើវិស័យសុខាភិបាល អប់រំ និងអភិវឌ្ឍន៍ធនធានមនុស្សនៅកម្ពុជា។ នេះបើតាមការចុះផ្សាយរបស់សម្ដេចតេជោ ហ៊ុន សែន កាលពីថ្ងៃទី២០ ខែឧសភា ឆ្នាំ២០២៤។

ជំនួយរបស់សាធារណរដ្ឋឆែកក្នុងវិស័យអប់រំនេះ ក៏ផ្តោតលើការផ្ដល់អាហារូបករណ៍ដល់និស្សិតកម្ពុជា ទៅសិក្សានៅសាធារណរដ្ឋឆែកជាបន្តបន្ទាប់។ បន្ថែមពីការប្រែក្លាយបំណុលសេសសល់ទៅជាជំនួយ សាធារណរដ្ឋឆែក ក៏នឹងជំរុញការផ្តល់ជំនួយឱ្យកាន់តែច្រើនបន្ថែមទៀតលើការអភិវឌ្ឍវិស័យសុខាភិបាល អប់រំ និងអភិវឌ្ឍន៍ធនធានមនុស្សនៅកម្ពុជា។ នេះជាការលើកឡើងរបស់ឯកឧត្តម Martin Vavra ឯកអគ្គរដ្ឋទូតសាធារណរដ្ឋឆែកប្រចាំកម្ពុជា។

ក្នុងជំនួបពិភាក្សាការងារជាមួយសម្ដេចតេជោ ហ៊ុន សែន ប្រធានព្រឹទ្ធសភា កាលពីថ្ងៃទី២០ ខែឧសភា ឆ្នាំ២០២៤ ឯកអគ្គរដ្ឋទូតសាធារណរដ្ឋឆែក ក៏បានប្ដេជ្ញាជំរុញទំហំពាណិជ្ជកម្មទ្វេភាគី តាមរយៈការវិនិយោគបន្ថែមនៅកម្ពុជា ព្រោះទំហំពាណិជ្ជកម្មរវាងប្រទេសទាំងពីរពុំទាន់មានតុល្យភាព ដោយការនាំចេញទំនិញពីកម្ពុជា ទៅសាធារណរដ្ឋឆែក មានទំហំស្ទើតែលើស១០០ដង នៃការនាំចូលពីឆែកមកកម្ពុជា។ សម្ដេចតេជោ ហ៊ុន សែន ក៏បានលើកឡើងថា ត្រូវជំរុញ និងធ្វើយ៉ាងណាឱ្យទំហំពាណិជ្ជកម្មរវាងប្រទេសទាំងពីរកើនឡើង ពិសេសមានតុល្យភាពជញ្ជីងពាណិជ្ជកម្ម ដោយបង្កើនការនាំចេញទំនិញរវាងប្រទេសទាំងពីរបន្ថែម៕