ភ្នំពេញ៖ សម្តេចធិបតី ហ៊ុន ម៉ាណែត បានមានប្រសាសន៍ថា គម្រោងព្រែកជីកហ្វូណនតេជោ នឹងត្រូវបានបើកការដ្ឋានសាងសង់ និងចាប់ផ្តើមបុកគ្រឹះ នៅពេលឆាប់ៗខាងមុននេះ មិនរងចាំចុងឆ្នាំនេះ ឬដើមឆ្នាំក្រោយឡើយ។ នេះបើតាមការចុះផ្សាយរបស់សម្តេចធិបតី ហ៊ុន ម៉ាណែត នៅថ្ងៃទី១៨ ខែឧសភា ឆ្នាំ២០២៤។

ក្នុងឱកាសសម្តេចធិបតី ហ៊ុន ម៉ាណែត បានអញ្ជើញជួបសំណេះសំណាលជាមួយបងប្អូនសហគមន៍ខ្មែរ នៅប្រទេសកូរ៉េខាងត្បូង សម្តេចធិបតីនាយករដ្ឋមន្ត្រី បានលើកឡើងថា៖ «គម្រោងព្រែកជីកហ្វូណនតេជោនេះ មិនមែនជារបស់ខ្ញុំ របស់សម្តេចតេជោ ឬរបស់ត្រកូលហ៊ុននោះទេ ត្រកូលហ៊ុន បានត្រឹមតែមានចំណែកមួយផ្នែកតូចក្នុងការចូលរួម និងជំរុញទេ ប៉ុន្តែព្រែកជីកហ្វូណននេះ ជាគម្រោងដែលកើតចេញពីការគាំទ្ររបស់ប្រជាជនខ្មែរនៅទូទាំងពិភពលោក និងជាគម្រោងរបស់ខ្មែរយើងដែលត្រូវការពារ និងធ្វើឱ្យបាន»។

សម្តេចធិបតី ហ៊ុន ម៉ាណែត បានបន្ថែមថា ការចូលរួមរបស់វិនិយោគិនបរទេស ក្នុងគម្រោងព្រែកជីកហ្វូណនតេជោមិនសំខាន់ទេ អ្វីដែលសំខាន់ខ្មែរត្រូវធ្វើឱ្យបាន និងត្រូវតែរួមគ្នាធ្វើ។ សម្តេចធិបតីនាយករដ្ឋមន្ត្រី បានបញ្ជាក់ថា គម្រោងព្រែកជីកនេះ ធ្វើឡើងដើម្បីឱ្យខ្មែររួមគ្នាប្រឆាំងនូវភាពមិនអភិវឌ្ឍន៍ កាត់បន្ថយភាពក្រីក្រ និងលើកកម្ពស់កម្ពុជា ឱ្យកាន់តែក្លាយទៅជាប្រទេសដែលមានជីវភាពខ្ពស់។

ក្នុងឱកាសដែលសម្តេចធិបតី ហ៊ុន ម៉ាណែត អញ្ជើញជួបសំណេះសំណាលជាមួយបងប្អូនសហគមន៍ខ្មែរ រស់នៅសាធារណរដ្ឋកូរ៉េនេះ សម្តេចធិបតី ហ៊ុន ម៉ាណែត បានអរគុណចំពោះប្រជាពលរដ្ឋទាំងអស់ បានចូលរួមគាំទ្រគម្រោងព្រែកជីកហ្វូណនតេជោ ដែលជាគម្រោងរបស់ជាតិខ្មែរយើង៕https://www.youtube.com/watch?v=Xh8BJmgNuMQ