ភ្នំពេញ៖ ក្រុមហ៊ុន Yunnan Provincial Investment Holding Group (YIG) បានបណ្តាក់ទុនបន្ថែមទៀត លើគម្រោងអភិវឌ្ឍន៍តំបន់ជុំវិញព្រលានយន្តហោះអន្តរជាតិអង្គរ ឱ្យក្លាយជាតំបន់វប្បធម៌ ទេសចរណ៍ និងពាណិជ្ជកម្មចម្រុះ សម្រាប់អភិវឌ្ឍន៍ផលិតផលទេសចរណ៍បន្ថែមថ្មីទៀតផងដែរ។ នេះបើតាមការចុះផ្សាយរបស់ក្រសួងទេសចរណ៍ នាថ្ងៃទី១៥ ខែតុលា ឆ្នាំ២០២៤។

ក្នុងជំនួបពិភាក្សាការងារជាមួយលោក Liu Minglin ប្រធានក្រុមហ៊ុន YIG ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានលើកឡើងថា កិច្ចពិភាក្សាការងារនេះ គឺដើម្បីស្តាប់នូវស្ថានភាពអាជីវកម្ម បញ្ហាប្រឈម និងការចូលរួមចំណែករបស់វិស័យឯកជន ក្នុងការអភិវឌ្ឍវិស័យទេសចរណ៍។

ក្នុងជំនួបនេះដដែល ភាគីទាំងពីរ ក៏បានលើកឡើងអំពីការទាក់ទាញភ្ញៀវទេសចរបរទេសឱ្យមកទស្សនាប្រទេសកម្ពុជាឱ្យបានច្រើន នឹងធ្វើឱ្យមានសន្ទុះឡើងវិញ សម្រាប់ជំរុញកំណើនសេដ្ឋកិច្ចតាមរយៈវិស័យទេសចរណ៍ នៅក្រោយវិបត្តិជំងឺកូវីដ-១៩ ៕