ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ សង្ឃឹមថា ក្រុមហ៊ុន-រោងចក្រជប៉ុនជាច្រើនទៀតរបស់ជប៉ុន នឹងនាំយកមកនូវបច្ចេកវិទ្យាទំនើបៗរបស់ជប៉ុនមកកម្ពុជា តាមរយៈការវិនិយោគ។ ឯកឧត្តម ហេង សួរ សង្ឃឹមបែបនេះនៅក្នុងជំនួបជាមួយឯកឧត្តម តាកាហាស៊ី ហ្វូមីយ៉ាគិ ប្រធានសមាគមជប៉ុន-កម្ពុជា (JCA) នាថ្ងៃទី១៨ ខែវិច្ឆិកា ឆ្នាំ២០២៤។

ក្នុងជំនួបនោះដែរ ឯកឧត្តម ហេង សួរ ក៏បានសង្ឃឹមបន្ថែមទៀតថា ក្រុមហ៊ុនជប៉ុន ដែលជាសមាជិកសមាគម JCA នឹងជួយផ្សព្វផ្សាយពីឱកាសវិនិយោគនៅកម្ពុជាទៅកាន់បណ្តាក្រុមហ៊ុនជប៉ុនផ្សេងៗទៀត ដើម្បីអាចមកស្វែងយល់ពីឱកាសវិនិយោគ និងសក្តានុពលរបស់កម្លាំងពលកម្មកម្ពុជា ពិសេសទទួលយកកម្មសិក្សាការី/ពលករដែលមានជំនាញពីកម្ពុជាបន្ថែមទៀត។

ឯកឧត្តម តាកាហាស៊ី ហ្វូមីយ៉ាគិ ក៏បានជឿជាក់ថា ក្រសួងការងារ និងបណ្តុះបណ្តាលវិជ្ជាជីវៈ នឹងបន្តផ្តល់ការសម្របសម្រួល និងកិច្ចសហការនានាសម្រាប់ក្រុមហ៊ុនជប៉ុននៅកម្ពុជា ដើម្បីអាចបង្កើតឱកាសការងារកាន់តែច្រើនសម្រាប់ប្រជាពលរដ្ឋកម្ពុជាផងដែរ។ ជាមួយគ្នានេះ រដ្ឋមន្ត្រីក្រសួងការងារ បានបញ្ជាក់ថា ដំណើការរបស់សមាគម JCA នៅកម្ពុជា បានលើកកម្ពស់សហគ្រាសធុនតូច និងមធ្យម (SMEs) ក្នុងវិស័យផ្សេងៗ រួមទាំងសេវាថែទាំរថយន្ត ការថែទាំ និងការបណ្តុះបណ្តាលផ្នែកព័ត៌មានវិទ្យាទៀតផង៕