ភ្នំពេញ៖ សិក្ខាសាលាស្តីពី«ការជំរុញភាពជាដៃគូរវាងវិស័យសាធារណៈ និងឯកជនលើបរិវត្តកម្មនៃការបណ្តុះបណ្តាលបច្ចេកទេស និងវិជ្ជាជីវៈ» គឺជាឱកាសដែលវិស័យសាធារណៈ និងម្ចាស់សហគ្រាស គ្រឹះស្ថានឯកជន និងដៃគូអភិវឌ្ឍន៍ ពិភាក្សាពីតម្រូវការ បញ្ហាប្រឈម និងធនធាន ដែលមានស្រាប់ ដើម្បីរកដំណោះស្រាយ និងវិធីសាស្ត្រពង្រឹងកិច្ចសហការអនុវត្តកម្មវិធីបណ្តុះបណ្តាលភាពជាដៃគូ។ នេះបើតាមការលើកឡើងរបស់ ឯកឧត្តម ប៉ុក ប៉ាន់ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ។

សិក្ខាសាលា ដែលធ្វើឡើងនៅទីស្តីការក្រសួងការងារ នាថ្ងៃទី២៦ ខែវិច្ឆិកា ឆ្នាំ២០២៤ ឯកឧត្តម ប៉ុក ប៉ាន់ ក៏បានបញ្ជាក់ថា មានគោលបំណងពង្រឹង និងពង្រីកកម្មវិធីស្ពានចម្លងបន្តជំនាញ, កម្មវិធីសមមូលអប់រំកម្រិតមូលដ្ឋានតាមអ៊ីនធឺណិត, កម្មវិធីហ្វឹកហ្វឺនកូនជាង, កម្មវិធីបណ្តុះបណ្តាលផ្លាស់ប្តូរជំនាញ, កម្មវិធីបណ្តុះបណ្តាលបង្កើនជំនាញ, កម្មវិធីសិក្សាផ្អែកលើការងារ និងកម្មវិធីបណ្តុះបណ្តាលតាមបច្ចេកវិទ្យាឌីជីថល។

បន្ថែមពីនេះ ក្នុងសិក្ខាសាលាខាងលើ ភាគីពាក់ព័ន្ធ ក៏ពិភាក្សាលើកម្មវិធីធ្វើតេស្តទទួលស្គាល់ការសិក្សា ដែលមានពីមុន និងសមត្ថភាពបច្ចុប្បន្ន ដើម្បីបើកច្រកទទួលស្គាល់ជំនាញដល់កម្លាំងពលកម្មដែលមានជំនាញ និងអាចបើកច្រកកាន់តែទូលំទូលាយសម្រាប់ការទទួលបានការបណ្តុះបណ្តាលពេញមួយជីវិតផងដែរ៕