ភ្នំពេញ៖ កម្ពុជា-កូរ៉េ រួមគ្នាជំរុញការវិនិយោគពីកូរ៉េមកកម្ពុជា ផ្តោតលើសហគ្រាសធុនតូច និងមធ្យម និងឧស្សាហកម្មប្រើប្រាស់បច្ចេកវិទ្យាខ្ពស់សម្រាប់នាំចេញ ដូចជា ឧស្សាហកម្មបង្គុំនិងដំឡើងរថយន្ត អេឡិចត្រូនិក បរិក្ខារអគ្គិសនី និងគ្រឿងម៉ាស៊ីន។ បើតាមសេចក្តីថ្លែងការណ៍រួមស្តីពីការបង្កើតភាពជាដៃគូយុទ្ធសាស្ត្ររវាងកម្ពុជា និងសាធារណរដ្ឋកូរ៉េ កាលពីថ្ងៃទី១៦ ខែឧសភា ឆ្នាំ២០២៤នេះ។

ក្នុងសេចក្តីថ្លែងការណ៍រួមនេះ ភាគីទាំងពីរ ក៏បានឯកភាពជំរុញកិច្ចសហការរវាងក្រុមប្រឹក្សាអភិវឌ្ឍន៍កម្ពុជា ជាមួយក្រសួងពាណិជ្ជកម្ម ឧស្សាហកម្ម និងថាមពលកូរ៉េ ស្ថានទូតសាធារណរដ្ឋកូរ៉េប្រចាំកម្ពុជា និងទីភ្នាក់ងារជំរុញពាណិជ្ជកម្ម-វិនិយោគកូរ៉េ ដើម្បីស្វែងរកលទ្ធភាពនៃការបង្កើតតំបន់សេដ្ឋកិច្ចពិសេសកម្ពុជា-សាធារណរដ្ឋកូរ៉េ ក្នុងគោលបំណងសម្របសម្រួល និងទាក់ទាញគម្រោងវិនិយោគបន្ថែមទៀតមកកាន់កម្ពុជា។

ជាមួយគ្នានេះ នៅក្នុងវិស័យហិរញ្ញវត្ថុរបស់កម្ពុជា ក៏មានការវិនិយោគរបស់កូរ៉េក្នុងស្ថាប័នហិរញ្ញវត្ថុចំនួន១៥ នៅកម្ពុជា ក្នុងនោះ កម្ពុជា-កូរ៉េ ក៏បានជំរុញកិច្ចសហប្រតិបត្តិការបន្ថែមទៀតក្នុងវិស័យហិរញ្ញវត្ថុ ដែលផ្តោតលើការប្រើប្រាស់ហិរញ្ញវត្ថុឌីជីថលផងដែរ៕