ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភា បានជំរុញឱ្យរាជរដ្ឋាភិបាលកម្ពុជា បើកការដ្ឋានសាងសង់«ព្រែកជីកហ្វូណនតេជោ»ឱ្យបានឆាប់យ៉ាងដូច្នេះថា៖ «កុំយប់យូរសុបិនច្រើន បើបើកការដ្ឋានសាងសង់ព្រែកជីកហ្វូណនតេជោបានឆាប់ គឺធ្វើទៅ ព្រោះបើនៅរង់ចាំទៀត ទន្ទឹមនឹងប្រជាពលរដ្ឋគាំទ្រពីមួយថ្ងៃទៅមួយថ្ងៃកាន់តែច្រើន។

ការជំរុញឱ្យបើកការដ្ឋានឱ្យបានឆាប់រហ័សនេះ ក្រោយសម្តេចតេជោមើលឃើញថា គម្រោង «ព្រែកជីកហ្វូណនតេជោ» នឹងផ្ដល់នូវផលប្រយោជន៍លើការអភិវឌ្ឍសេដ្ឋកិច្ចជាតិ និងឯករាជ្យភាពរបស់ជាតិ។ សម្តេចតេជោប្រធានព្រឹទ្ធសភា បានថ្លែងសារពិសេសពាក់ព័ន្ធព្រែកជីកនេះ កាលពីថ្ងៃទី១៦ ខែឧសភា ឆ្នាំ២០២៤ ថា ក្នុងគម្រោង«ព្រែកជីកហ្វូណនតេជោ» ប្រវែង ១៨០គីឡូម៉ែត្រ ដែលតភ្ជាប់ផ្លូវទឹករវាងទន្លេទៅកាន់សមុទ្រកម្ពុជា ឆ្លងកាត់ខេត្តកណ្តាល តាកែវ កំពត និងខេត្តកែបនេះ មាន ៨០គីឡូម៉ែត្រ ដែលសម្តេចបានដឹកនាំធ្វើរួចមកហើយ សម្រាប់ប្រើប្រាស់ជាប្រព័ន្ធស្រោចស្រពដំណាំរបស់ពលរដ្ឋ និងប្រព័ន្ធដឹកជញ្ជូននាពេលបច្ចុប្បន្ន។

ប្រធានព្រឹទ្ធសភា សម្តេចតេជោ ហ៊ុន សែន បានលើកឡើងបន្ថែមថា៖«ក្នុងគម្រោងនេះ យើងមានស្នាមដានជាច្រើនកន្លែងរួចមកហើយ ដូច្នេះ គ្រាន់តែពង្រីកឱ្យក្លាយជាប្រព័ន្ធដឹកជញ្ជូនដ៏ល្អប៉ុណ្ណោះ ក្រៅពីនេះមានកន្លែងតិចតួចណាស់ដែលត្រូវធ្វើថ្មី ដើម្បីទម្លាយវាតភ្ជាប់ជាមួយនឹងទន្លេ»៕ https://www.youtube.com/watch?v=yFrgtIlK_eU