ភ្នំពេញ៖ ពិព័រណ៌ផលិតផលក្នុងស្រុក«ភូមិមួយផលិតផលមួយ» នឹងរៀបចំធ្វើនៅខេត្តសៀមរាប នាថ្ងៃទី២៦-៣០ កញ្ញានេះ ក្នុងទិវាពិភពលោកស្អាតលើកទី៦ និងទិវាទេសចរណ៌ពិភពលោកឆ្នាំ២០២៣។ នេះបើតាមសេចក្តីជូនដំណឹងរបស់រដ្ឋបាលខេត្តសៀមរាប នៅថ្ងៃទី២២ ខែកញ្ញានេះ។

ពិព័រណ៌ផលិតផលក្នុងស្រុកភូមិមួយផលិតផលមួយ និងការដាក់តាំងបង្ហាញផលិតផលផ្សេងៗទៀតផងនោះ នឹងធ្វើបរិវេណសួនព្រះរាជដំណាក់ នៃក្រុងសៀមរាប ដែលរៀបចំដោយរដ្ឋបាលខេត្តសៀមរាប សហការរៀបចំជាមួយគណៈកម្មាធិការជាតិជំរុញចលនាភូមិមួយផលិតផលមួយ, មន្ទីរទេសចរណ៍, ស.ស.យ.ក, ប្រតិបត្តិករវិស័យទេសចរណ៍ និងវិស័យឯកជនផងដែរ។

ពិព័រណ៌ផលិតផលក្នុងស្រុក«ភូមិមួយផលិតផលមួយ» ដែលរៀបចំក្នុងឱកាសនៃទិវាពិភពលោកស្អាតលើកទី៦ និងទិវាទេសចរណ៌ពិភពលោកឆ្នាំ២០២៣ នោះ ត្រូវបានរដ្ឋបាលខេត្តសៀមរាប បញ្ជាក់ផងដែរពីការប្រារព្វកម្មវិធី«ទិវាពិភពលោកស្អាតលើកទី៦» នៅព្រឹកថ្ងៃទី២៧ និងនាពេលល្ងាចក្នុងថ្ងែដែល នឹងរៀបចំប្រារព្វអបអរសាទរទិវាទេសចរណ៌ពិភពលោក ក្រោមប្រធានបទ«ទេសចរណ៌ និងការវិនិយោគបៃតង» ដែលកម្មវិធីទាំងពីរនេះប្រារព្វធ្វើនៅសួនព្រះរាជដំណាក់ក្រុងសៀមរាបដូចគ្នា៕