ភ្នំពេញ៖ ដើម្បីជំរុញការគ្រប់គ្រងបរិស្ថាន និងធនធានធម្មជាតិប្រកបដោយចីរភាព ការវិនិយោគ ត្រូវគិតគូរជាចម្បងដល់ប្រជាសហគមន៍នៅតាមតំបន់ការពារធម្មជាតិ ឱ្យមានមុខរបរបន្ថែម លើសពីរបរដែលពឹងផ្អែកទៅលើធនធានធម្មជាតិ និងការដកហូតអនុផលព្រៃឈើ។ នេះជាការលើកឡើងរបស់ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន ក្នុងជំនួបជាមួយក្រុមហ៊ុន Mana-gement Venture Asia (Cambodia) ltd ក្រុមហ៊ុន TOYO Ventures Holdings Berhad និងក្រុមហ៊ុន Energy China។

ក្នុងជំនួបនេះ ឯកឧត្តមបណ្ឌិត អ៊ាង សុផល្លែត បានថ្លែងថា៖«ការធ្វើឱ្យប្រជាពលរដ្ឋ ជាពិសេសប្រជាសហគមន៍នៅតាមតំបន់ការពារធម្មជាតិមានលំនឹងសេដ្ឋកិច្ច តាមរយៈការបង្កើតមុខរបរបន្ថែម លើសពីមុខរបរដែលមានស្រាប់ គឺជាការវិនិយោគបៃតង ដែលជាគោលដៅចម្បងឆ្ពោះទៅរកភាពស្អាត ភាពបៃតង និងចីរភាព។

រដ្ឋមន្រ្តីក្រសួងបរិស្ថាន បានបន្តថា ដើម្បីធានាបាននូវលំនឹងសេដ្ឋកិច្ចគ្រួសាររបស់ប្រជាសហគមន៍ តាមរយៈប្រាក់ចំណូលប្រចាំថ្ងៃពីរបរបន្ថែម ដែលបានមកពីការវិនិយោគផ្ទាល់ នេះគឺជាការជួយឱ្យប្រជាសហគមន៍នៅតាមមូលដ្ឋាន មានឯករាជ្យភាព និងភាពជាម្ចាស់។ ឯកឧត្តមបណ្ឌិត អ៊ាង សុផល្លែត ក៏បានបន្ថែមថា ទាំងនេះ គឺជាភាពជោគជ័យនៃគម្រោងប្រកបដោយចីរភាព អនុលោមតាមយុទ្ធសាស្រ្តចក្រាវិស័យបរិស្ថាន និងសមស្របតាមអនុសាសន៍របស់សម្តេចធិបតី ហ៊ុន ម៉ាណែត។

តាមការចុះផ្សាយរបស់ក្រសួងបរិស្ថាន កាលពីថ្ងៃទី២៤ ខែមេសា ឆ្នាំ២០២៤ នៅក្នុងជំនួបជាមួយបណ្តាក្រុមហ៊ុនអន្តរជាតិខាងលើ ឯកឧត្តមរដ្ឋមន្រ្តីក្រសួងបរិស្ថាន កំពុងគិតគូរ និងកៀរគរអ្នកវិនិយោគក្នុង និងក្រៅស្រុក ឱ្យចូលរួមចំណែកជាមួយវិស័យបរិស្ថានកម្ពុជាបន្ថែមទៀត៕