ភ្នំពេញ៖ ក្រសួងពាណិជ្ជកម្ម បានកំណត់ឱ្យបុគ្គលដែលធ្វើធុរកិច្ចផ្គត់ផ្គង់ផលិតផលទំនិញ និងសេវាទាំងអស់ ត្រូវបិទស្លាកតម្លៃជាប្រាក់រៀលលើផលិតផលទំនិញ និងសេវាគ្រប់មុខ ដែលតាំងលក់ ក្នុងផ្សារទំនើប ម៉ាត មីនីម៉ាត អាគារលក់ផលិតផល ស្ថានីយដេប៉ូលក់ប្រេងឥន្ធនៈជាដើម។ នេះបើតាមសេចក្តីប្រកាស ស្តីពី ការអនុវត្តមិនសុចរិតក្នុងធុរកិច្ច ពាក់ព័ន្ធនឹងការផ្សាយពាណិជ្ជកម្ម និងការជំរុញលក់។

ក្នុងសេចក្តីប្រកាសរបស់ក្រសួងពាណិជ្ជកម្ម បានបញ្ជាក់ថា ការបិទស្លាកតម្លៃជាប្រាក់រៀលលើផលិតផលទំនិញ និងសេវាគ្រប់មុខ ចំពោះតូប ឬបញ្ជរលក់ទំនិញបន្ទាប់បន្សំ ត្រូវបានលើកលែង។ ចំពោះ ករណីដែលអាចបិទស្លាកថ្លៃជារូបិយប័ណ្ណបរទេសបាន លុះត្រាតែមានការអនុញ្ញាតពីក្រសួង ស្ថាប័ន ឬអាជ្ញាធរមានសមត្ថកិច្ចពាក់ព័ន្ធស្របទៅតាមច្បាប់ឬបទប្បញ្ញតិដែលមានជាធរមាន។

ក្នុងសេចក្តីប្រកាស ស្តីពី ការអនុវត្តមិនសុចរិតក្នុងធុរកិច្ច ពាក់ព័ន្ធនឹងការផ្សាយពាណិជ្ជកម្ម និងការជំរុញលក់ ដែលចេញផ្សាយកាលពីថ្ងៃទី១២ ខែមេសា ឆ្នាំ២០២៤ ក៏បានបញ្ជាក់បន្ថែមថា ការបិទស្លាកតម្លៃ ត្រូវតែសរសេរជាអក្សរខ្មែរនៅពីមុខ ឬនៅពីលើ និងអក្សរបរទេសត្រូវនៅបន្ទាប់ ឬនៅពីខាងក្រោម៕