ភ្នំពេញ៖ កម្ពុជា កំពុងចរចារកិច្ចព្រមព្រៀងស្តីពីការចៀសវាងការយកពន្ធត្រួតគ្នា (DTA) ជាមួយរដ្ឋបាលសារពើពន្ធនៃប្រទេសជាដៃគូចំនួន៧ រួមមាន៖ ហ្វីលីពីន ឡាវ មីយ៉ាន់ម៉ា អេមីរ៉ាតអារ៉ាប់រួម ជប៉ុន ម៉ារ៉ុក និងបារាំង។ នេះបើតាមព្រឹត្តិបត្រព័ត៌មានប្រចាំសប្តាហ៍ របស់អគ្គនាយកដ្ឋានពន្ធដារ ចេញផ្សាយកាលពីថ្ងៃទី១៨ ខែមេសា ឆ្នាំ២០២៤។

ក្នុងព្រឹត្តិបត្រព័ត៌មានដដែល បញ្ជាក់ថា ក្រៅពីការចៀសវាងយកពន្ធត្រួតគ្នា កិច្ចព្រមព្រៀងនេះ ក៏នឹងដើរតួយ៉ាងសំខាន់ ក្នុងការទាក់ទាញការវិនិយោគផ្ទាល់ពីបរទេស និងបង្កើនភាពប្រកួតប្រជែងជាអន្តរជាតិផងដែរ។ DTA នឹងផ្តល់ទំនុកចិត្តដល់វិនិយោគិនបរទេស តាមរយៈការផ្តល់វិធានការច្បាស់លាស់ក្នុងការកំណត់សិទ្ធិយកពន្ធ រវាងរដ្ឋភាគីនៃកិច្ចព្រមព្រៀង, បន្ធូរបន្ថយលើការអនុវត្តចំពោះប្រភេទពន្ធមួយចំនួន, ទប់ស្កាត់ ឬលុបបំបាត់ការរើសអើងពន្ធរវាងក្រុមហ៊ុនក្នុងស្រុក និងក្រុមហ៊ុនបរទេស, ផ្តល់យន្តការដោះស្រាយវិវាទសារពើពន្ធ និងយន្តការផ្លាស់ប្តូរព័ត៌មានរវាងរដ្ឋភាគីនៃកិច្ចព្រមព្រៀង ដើម្បីដោះស្រាយបញ្ហាការគេចវេះពន្ធជាដើម។

បច្ចុប្បន្ន កិច្ចព្រមព្រៀង ស្តីពីការចៀសវាងការយកពន្ធត្រួតគ្នា(DTA) រវាងកម្ពុជា និងប្រទេសយុត្តាធិការដៃគូចំនួន១១ រួមមាន៖ សិង្ហបុរី ចិន ថៃ ព្រុយណេ វៀតណាម ឥណ្ឌូនេស៊ី ម៉ាឡេស៊ី កូរ៉េខាងត្បូង តំបន់ រដ្ឋបាលពិសេសហុងកុង តំបន់រដ្ឋបាលពិសេសម៉ាកាវ និងតួកគី។ គួរបញ្ជាក់ថា និវាសនជននៃប្រទេស ដែលបានចុះកិច្ចព្រមព្រៀង ត្រូវដាក់ពាក្យស្នើសុំត្រួតពិនិត្យលក្ខណសម្បត្តិមកអគ្គនាយកដ្ឋានពន្ធដារជាមុន ដើម្បីទទួលបានអត្ថប្រយោជន៍ពី (DTA)៕