ភ្នំពេញ៖ កូនត្នោតចំនួន ១០ ០០០ដើម ត្រូវបានបន្តដាំនៅតាមខ្សែក្រវាត់ព្រំដែនកម្ពុជា-វៀតណាម ដែលស្ថិតនៅក្នុងស្រុកពញាក្រែក ខេត្តត្បូងឃ្មុំ កាលពីថ្ងៃទី៧ ខែសីហា ឆ្នាំ២០២៤។ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានលើកឡើងថា ការដាំកូនត្នោតចំនួន ១០ ០០០ដើម ជាព្រឹត្តិការណ៍ប្រវត្តិសាស្រ្ត ដើម្បីបណ្ដុះផ្នត់គំនិត«ពន្លកបៃតង»។

ឯកឧត្តមបណ្ឌិត អ៊ាង សុផល្លែត បានបន្ថែមថា ការបណ្ដុះផ្នត់គំនិតពន្លកបៃតង គឺជាការរួមចំណែកក្នុងយុទ្ធសាស្រ្តចក្រាវិស័យបរិស្ថាន ដែលផ្តល់ផលប្រយោជន៍ដល់ប្រជាពលរដ្ឋ និងបរិស្ថាន។ ក្នុងនោះ រដ្ឋមន្ត្រីក្រសួងបរិស្ថាន បានឱ្យដឹងថា ព្រឹត្តិការណ៍ដាំកូនត្នោត មានសារសំខាន់ណាស់ក្នុងការបំផុសស្មារតីរបស់ពលរដ្ឋឱ្យស្រឡាញ់ធនធានធម្មជាតិ ស្រឡាញ់ទឹកដី ការពារនិងអភិរក្សធនធានធម្មជាតិ ការថែរក្សាអត្តសញ្ញាណ និងវប្បធម៌ជាតិរបស់កម្ពុជា។

តាមការចុះផ្សាយរបស់ក្រសួងបរិស្ថាន នាថ្ងៃទី៨ សីហា ដើម្បីបង្កើនគម្របបៃតង និងសម្រេចទស្សនវិស័យរបស់រដ្ឋាភិបាលកម្ពុជា ដែលបានដាក់ចេញគោលនយោបាយបង្កើនគម្របព្រៃឱ្យបាន ៦០% នៅឆ្នាំ២០៥០ ឯកឧត្តមបណ្ឌិត អ៊ាង សុផល្លែត បានប្រគល់កូនត្នោតចំនួន ៣០ម៉ឺនដើម ដល់ក្រុមយុទ្ធនាការ«ពន្លកបៃតង» នៅឆ្នាំ២០២៤ ខណៈដែលក្រសួង និងនៅតាមមន្ទីរបរិស្ថានទូទាំងប្រទេស បានចែកកូនឈើសរុប ១លាន ៣សែនដើម ដល់ប្រជាពលរដ្ឋដោយឥតគិតថ្លៃ៕