ភ្នំពេញ៖ ពិធីចូលឆ្នាំថ្មី ប្រពៃណីជាតិ នឹងចូលមកដល់នៅថ្ងៃទី១៣ ដល់ថ្ងៃ១៦ មេសា ខាងមុខនេះ ខណៈដែលនៅស្ថាប័ន និងទីប្រជុំជនមួយចំនួនបាននិងកំពុងរៀបចំពិធីសង្ក្រានឆ្នាំថ្មី ជាបណ្តើរៗហើយ។ ក្នុងពិធីសម្ពោធឆ្លងព្រះបទុមចេតិយ និងសមិទ្ធផលនានា នៅវត្តមណីរតនារាម នៅខេត្តពោធិ៍សាត់ នាថ្ងៃទី៣១ មីនាកន្លងទៅ សម្តេចធិបតី ហ៊ុន ម៉ាណែត ស្នើឱ្យសហការរៀបចំសង្ក្រាន, ល្បែងប្រជាប្រិយ, សន្តិសុខសណ្តាប់ធ្នាប់ឱ្យបានល្អ និងប្រព្រឹត្តិទៅឱ្យបានរលូន។

ក្នុងពិធីសម្ពោធឆ្លងព្រះបទុមចេតិយនេះ សម្តេចធិបតី ហ៊ុន ម៉ាណែត បានបន្តថា៖«សូមរៀបចំល្បែងប្រពៃណីឱ្យបានច្រើន រៀបចំទីកន្លែង រៀបចំសម្ភារ និងឧបករណ៍ ដូចជា អង្គុញ ចោលឈូង ជាពិសេស សូមឱ្យប្រជាពលរដ្ឋយើង និងក្មេងៗ ចូលរួមលេងល្បែងប្រជាប្រិយឱ្យបានច្រើន ដែលជាប្រពៃណីវប្បធម៌របស់យើងឱ្យបានសប្បាយទាំងអស់គ្នា»។

ជាមួយគ្នានេះ សម្តេចធិបតី ហ៊ុន ម៉ាណែត បានលើកឡើងថា យុវជន ដែលចូលរួមលេងកម្សាន្តក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ សូមចូលរួមលេងកម្សាន្តដោយការទទួលខុសត្រូវ សូមកុំលេង ឬធ្វើសកម្មភាពណាមួយ ដែលបង្កគ្រោះថ្នាក់ដល់អ្នកដទៃ។ យុវជន គឺត្រូវចាត់ទុកគ្នាដូចបងប្អូន ចូលរួមលេងសប្បាយ ប្រកបដោយទំនួលខុសត្រូវ យោគយល់អធ្យាស្រ័យគ្នាទៅវិញទៅមក និងកុំប្រព្រឹត្តអំពើណាដែលនាំឱ្យប៉ះពាល់សិទ្ធិ និងសេចក្តីថ្លៃថ្នូររបស់ស្ត្រី ក្នុងឱកាសចូលឆ្នាំថ្មីប្រពៃណីជាតិខ្មែរ៕https://www.youtube.com/watch?v=AiVjVS9i1bY