ភ្នំពេញ៖ លោកជំទាវ អ៊ឹម រចនា អនុ​រដ្ឋ​លេខាធិការ ក្រសួងកសិកម្ម រុក្ខាប្រមាញ់ និងនេសាទ បានលើកឡើងថា ទីតាំងសហគមន៍នេសាទអេកូទេសចរណ៍ «បឹងរំអិល» ជាតំបន់ទេសចរណ៍ប្រកបដោយសក្ដានុពល​មួយកន្លែង​ទៀតក្នុងខេត្តក្រចេះ បន្ទាប់ពីរមណីដ្ឋានទេសចរកាំពី នឹងអាចប្រែក្លាយទៅជាតំបន់ទេសចរណ៍ប្រកបដោយ​សក្ដានុពល​មួយ ហើយជួយលើកស្ទួយជីវភាពប្រជាសហគមន៍​នេសាទ។

ក្នុងដំណើរចុះ​ពិនិត្យវឌ្ឍនភាព​​​នៃការសាងសង់ស្នាក់ការសហគមន៍នេសាទអេកូទេសចរណ៍ «បឹងរំអិល» ស្ថិតនៅឃុំសំបុក ស្រុក​ចិត្របុរី ខេត្តក្រចេះ ដែលសម្រេចបានប្រមាណជា ៥០ ទៅ ៦០ភាគរយ លោកជំទាវ អ៊ឹម រចនា បានលើកឡើងថា តាមរយៈការ​ចុះបញ្ជីនៅឆ្នាំ២០១១ សហគមន៍នេះ មានតំបន់អភិរក្សត្រីមេពូជ មាន​សត្វស្លាបកម្រ និងមានបរិយាកាសព្រមទាំងទេសភាពល្អៗ ដែលអាច​ទាក់​ទាញភ្ញៀវទេសចរមកទស្សនាកម្សាន្ត និងស្នាក់នៅបាន។ 

គួរបញ្ជាក់ថា ទីតាំងសហគមន៍នេសាទអេកូទេសចរណ៍ «បឹងរំអិល» រៀបចំធ្វើឡើងដែលមានកិច្ចសហការពីអគ្គនាយក​ដ្ឋាន​ជលផល ក្រោមជំនួយបច្ចេកទេសពីអង្គការ FAO និងថវិកាឧបត្ថម្ភពី​ប្រទេសកូរ៉េខាងត្បូង។ ជំនួយសម្រាប់អភិវឌ្ឍសហគមន៍នេះ មានជាអាថិ៍៖ ការសាងសង់ស្នាក់ការសហគមន៍ ភោជនីយដ្ឋាន ផ្ទះស្នាក់ បន្ទប់ទឹក និងទូកសម្រាប់ទេសចរជួលចែវកម្សាន្តមើល​ទេសភាព​ជាដើម ដែលនឹងជួយលើកស្ទួយជីវភាពប្រជាសហគមន៍​នេសាទ អាចរកចំណូលបន្ថែម និងកាត់បន្ថយការនេសាទក្នុង​ដែន​ទឹកធម្មជាតិ៕