ភ្នំពេញ៖ គណៈមេធាវីនៃព្រះរាជាណាចក្រកម្ពុជា និងនិយ័តករបរធនបាលកិច្ច ចុះអនុស្សរណៈនៃការយោគយល់ (MoU) បង្កើនកិច្ចសហប្រតិបត្តិការលើកកម្ពស់ការយល់ដឹង និងការអនុវត្តច្បាប់ក្នុងវិស័យបរធនបាលកិច្ច ព្រមទាំងការចូលរួមលើកកម្ពស់ការអនុវត្តវិជ្ជាជីវៈមេធាវីក្នុងវិស័យបរធនបាលកិច្ច។

ក្នុងពិធីចុះអនុស្សរណៈនៃការយោគយល់រវាងស្ថាប័នទាំងពីរ ត្រូវបានធ្វើឡើងក្រោមអធិបតីភាពលោកមេធាវី សាំង វណ្ណៈ ប្រធានគណៈមេធាវីនៃព្រះរាជាណាចក្រកម្ពុជា និងឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច ព្រមទាំងមានការចូលរួមពីថ្នាក់ដឹកនាំ មន្ត្រីនិងបុគ្គលិកនៃស្ថាប័នទាំងពីរ និងភ្ញៀវកិត្តិយស។

យោងតាមការចុះផ្សាយរបស់គណៈមេធាវីនៃព្រះរាជាណាចក្រកម្ពុជា ផ្អែកតាមអនុស្សរណៈនៃការយោគយល់ ដែលធ្វើឡើងនៅថ្ងៃទី១៨ ខែមីនា ឆ្នាំ២០២៦ ស្ថាប័នទាំងពីរឯកភាពចំណុចចំនួន៤ រួមមាន៖ ទី១. រៀបចំឱ្យមានការបណ្តុះបណ្តាលនិងការផ្សព្វផ្សាយច្បាប់និងបទដ្ឋានគតិយុត្តទាក់ទងនឹងបរធនបាលកិច្ចដល់សមាជិកគណៈមេធាវី។

ទី២.បង្ហាញអំពីជំហរគាំទ្រគ្នាទៅវិញទៅមកក្នុងការផ្សព្វផ្សាយច្បាប់និងបទដ្ឋានគតិយុត្តទាក់ទងនឹងបរធនបាលកិច្ច ព្រមទាំងពង្រីកទីផ្សារការងាររបស់មេធាវីក្នុងវិស័យបរធនបាលកិច្ចតាមរយៈការបញ្ជ្រាបការយល់ដឹងអំពីតួនាទីមេធាវីក្នុងវិស័យបរធនបាលកិច្ច។

ទី៣. ការបញ្ចូលមុខវិជ្ជាសិក្សាពាក់ព័ន្ធនឹងបរធនបាលកិច្ចក្នុងការបណ្តុះបណ្តាលសិស្សមេធាវី ដោយមានជំនួយបច្ចេកទេសពីនិយ័តករបរធនបាលកិច្ច។ និង៤.ការលើកឡើងពីបញ្ហាប្រឈមនិងដំណោះស្រាយដែលបានជួបប្រទះក្នុងការអនុវត្តវិជ្ជាជីវៈមេធាវីក្នុងវិស័យបរធនបាលកិច្ច៕