ភ្នំពេញ៖ សារមន្ទីរតេជោសន្តិភាព ខេត្តសៀមរាប​ បានរៀបចំពិធីបញ្ចប់ការសាងសង់ និងផ្ទេរ-ប្រគល់អគារសន្ដិភាព ដែលមានទំហំ៥២x៥២ម៉ែត្រ ២ជាន់ មានកម្ពស់ ១៧ម៉ែត្រ ព្រមទាំងមានប្លង់បានខឿនអគារទំហំ ​១០៨មx១០៨ម​ ដែលមានក្រឡាផ្ទៃសរុបចំនួន ៤ ០១២ម៉ែត្រក្រឡា​ សាងសង់លើផ្ទៃដីសារមន្ទីរតេជោសន្តិភាពទាំងមូលសរុបប្រមាណ ១៤,៨ហិកតា នៅថ្ងៃទី២ ខែមីនា ឆ្នាំ២០២៦។ 

សារមន្ទីរតេជោសន្តិភាព​នេះ ​ត្រូវបានកសាងឡេីង​ ដេីម្បីថែរក្សាមរតកប្រវត្តិសាស្ត្រក្នុងស្មារតីរំលឹកចងចាំនូវទុក្ខសោកនាដកម្មនៃសង្គ្រាមនៅ​កម្ពុជា និងផ្សព្វផ្សាយវប្បធម៌សន្តិភាពសម្រាប់មនុស្សជាតិ។ សំណង់អគារនេះ​ ជាជំនួយហិរញ្ញប្បទានឥតសំណងរបស់រាជរដ្ឋាភិបាល និងប្រជាជនជប៉ុន តាមរយៈJICA ផ្ដល់ជូនរាជរដ្ឋាភិបាលកម្ពុជា ដេីម្បីគាំទ្រដល់អង្គភាពCMAC។

អគារសន្ដិភាពនេះ​ ត្រូវបានសាងសងដោយក្រុមហ៊ុនជប៉ុន Sato Kogyo Co., Ltd​ ដែលបានចាប់ផ្តេីម​កាលពីដើមឆ្នាំ២០២៤ ហើយបានបញ្ចប់ការសាងសង់និងប្រារព្ធពិធីផ្ទេរ-ប្រគល់សំណង់។ ពិធីផ្ទេរប្រគល់និងប្រកាសដាក់ឱ្យប្រេីប្រាស់ជំនួយនេះ ជាផ្លូវការនឹងប្រព្រឹត្តិទៅនាពេលខាងមុខ​ នៅពេលវេលាសមស្របដែលការរៀបចំខ្លឹមសារ​ រូបភាពនិងការតាក់តែងខាងក្នុងអគារបានបញ្ចប់។ 

ជាមួយគ្នានេះ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់ បានថ្លែងអំណរគុណដល់រដ្ឋាភិបាលនិងប្រជាជនជប៉ុន ដែលបានផ្តល់ហិរញ្ញប្បទានឥតសំណងដ៏មានតម្លៃសម្រាប់ការសាងសង់អគារផ្សព្វផ្សាយអប់រំយល់ដឹងពីសង្គ្រាមនេះឡេីង។ ទន្ទឹងនឹងនេះ​ ឯកឧត្តម ហេង រតនា ក៏បានថ្លែងអំណរគុណដល់ថ្នាក់ដឹនាំ មន្រ្តីJICA ក៏ដូចជាក្រុមហ៊ុន consultants (The consortium of Oriental Consultants Global Co. Ltd and the Japan International Cooperation System) និងក្រុមហ៊ុនសំណង់SATO KOGYO គ្រប់ឋានានុក្រម ដែលតែងតែជួយសម្របសម្រួលយ៉ាងសកម្ម និងមានប្រសិទ្ធភាព ធានាថាសំណង់ទាំងអស់ប្រកបដោយគុណភាពខ្ពស់ និងបានធ្វើឱ្យការអនុវត្តគម្រោងនេះដោយជោគជ័យ៕