ភ្នំពេញ៖ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម និងក្រុមការងារបេសកកម្មរបស់ធនាគារអភិវឌ្ឍន៍អាស៊ី (ADB) ពិភាក្សាអំពីតម្រូវការជំនួយបច្ចេកទេសបន្ថែម និងលទ្ធភាពបន្តរៀបចំនូវកម្មវិធីជំនួយថ្មីរបស់ ADB បន្ទាប់ពីអនុកម្មវិធីទី៣ ត្រូវបញ្ចប់ជាស្ថាពរ ដើម្បីធានានូវចីរភាពនៃកំណើនពាណិជ្ជកម្ម និងភាពប្រកួតប្រជែងពាណិជ្ជកម្មកម្ពុជា។

លោកជំទាវ តឹករ៉េត កំរង និង ក្រុមការងារបេសកកម្មរបស់ធនាគារ ADB ស្តីពីការអនុវត្តសកម្មភាពគោលនយោបាយ ដែលជាជំនួយបច្ចេកទេសរបស់ ADB ក្រោមអនុកម្មវិធីទី៣ នៃកម្មវិធីពង្រឹងភាពប្រកួតប្រជែងពាណិជ្ជកម្ម (Trade and Competitiveness Program) បានផ្តោតលើការជំរុញការបង្កើតបទបញ្ញត្តិថ្មីក្នុងការអនុវត្តច្បាប់ពាណិជ្ជកម្មចំនួន៣ រួមមាន៖ ច្បាប់ស្តីពីប្រតិបត្តិការដែលមានកិច្ចធានា ច្បាប់វិធានដើមកំណើតទំនិញ និងច្បាប់ឧបាស្រ័យពាណិជ្ជកម្ម។ នេះបើតាមការចុះផ្សាយរបស់ក្រសួងពាណិជ្ជកម្ម កាលពីថ្ងៃទី១៩ ខែកុម្ភៈ ឆ្នាំ២០២៦៕