ភ្នំពេញ៖ សហគមន៍ស្វាយចន្ទី និងគណៈប្រតិភូទីភ្នាក់ងារថាមពលកូរ៉េ (The Korea Energy Agency) ពិភាក្សាអំពីកិច្ចសហប្រតិបត្តិការ និងឱកាសវិនិយោគរបស់ក្រុមហ៊ុនកូរ៉េ លើការកែច្នៃប្រេង និងឧស្ម័នពីសំបកគ្រាប់ស្វាយចន្ទីនៅកម្ពុជា សម្រាប់នាំចេញទៅទីផ្សារកូរ៉េ និងទីផ្សារសក្តានុពលក្នុងតំបន់ដ៏ទៃទៀត។

ក្នុងជំនួបពិភាក្សាការងារ ដែលដឹកនាំដោយ ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម កាលពីថ្ងៃទី២២ ខែកក្កដា ឆ្នាំ២០២៥ គណៈប្រតិភូនៃទីភ្នាក់ងារថាមពលកូរ៉េ (The Korea Energy Agency) ដែលដឹកនាំដោយលោក Kyoungmin Kim ប្រធានក្រុមគាំទ្រគម្រោងក្រៅប្រទេសនៃនាយកដ្ឋានសហប្រតិបត្តិការអន្តរជាតិ នឹងបន្តដំណើរទស្សនកិច្ចចុះសិក្សាផ្ទាល់នៅចំការស្វាយចន្ទី ដែលស្ថិតនៅក្នុងខេត្តកំពង់ធំ។

កិច្ចប្រជុំនេះ ក៏មានការចូលរួមពី ឯកឧត្តម អ៊ុំ កុសល អនុរដ្ឋលេខាធិការក្រសួងពាណិជ្ជកម្ម និងក្រុមការងារ នៃអគ្គនាយកដ្ឋានពាណិជ្ជកម្មក្នុងប្រទេស និងអគ្គនាយកដ្ឋានជំរុញពាណិជ្ជកម្ម ព្រមទាំងមានការចូលរួមពីគណៈប្រតិភូក្រុមការងារសហព័ន្ធស្វាយចន្ទីកម្ពុជា ជាច្រើនរូបផងដែរ។ នេះបើតាមការចុះផ្សាយរបស់ ក្រសួងពាណិជ្ជកម្ម កាលពីថ្ងៃទី២២ ខែកក្កដា ឆ្នាំ២០២៥៕