ភ្នំពេញ៖ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ និង ឯកឧត្តម KIM JAE-SHIN អគ្គលេខាធិការនៃមជ្ឈមណ្ឌលអាស៊ាន-កូរ៉េ ពិភាក្សាគ្នាពង្រឹងកិច្ចសហប្រតិបត្តិការ និងផ្សព្វផ្សាយគោលដៅសក្តានុពលទេសចរណ៍ រួមទាំងកាលានុវត្តភាពវិនិយោគនៅកម្ពុជា ឱ្យបានទូលំទូលាយដល់ប្រជាជនកូរ៉េ ដើម្បីទាក់ទាញវិនិយោគិនកូរ៉េ មកបណ្តាក់ទុនវិនិយោគឱ្យបានកាន់តែច្រើនបន្ថែមទៀត។

ក្នុងជំនួបពិភាក្សាការងារទ្វេភាគីរវាង ឯកឧត្តម ហួត ហាក់ និង ឯកឧត្តម KIM JAE-SHIN កាលពីថ្ងៃទី២១ ខែកក្កដា ឆ្នាំ២០២៥ ភាគីទាំងពីរ ក៏បានពិភាក្សាគ្នាអំពីការរៀបចំឱ្យមានសកម្មភាពទេសចរណ៍វប្បធម៌សំខាន់ៗ ដែលមានលក្ខណៈជាក់ស្តែង និងប្លែករវាង កម្ពុជា-កូរ៉េផងដែរ។ ឯកឧត្តម KIM JAE-SHIN ក៏បានមានប្រសាសន៍ថា «ប្រជាជនកូរ៉េស្រលាញ់ប្រទេសកម្ពុជា»។

ជាមួយគ្នានេះ ឯកឧត្តម ហួត ហាក់ ក៏បានអរគុណដល់ ឯកឧត្តម KIM JAE-SHIN និងប្រជាជនកូរ៉េ ដែលតែងតែជួយជ្រោមជ្រែង និងគាំទ្រដល់រដ្ឋាភិបាលកម្ពុជា និងប្រជាជនកម្ពុជា រហូតមក ដែលបន្សល់ទុកនូវសមិទ្ធិផលប្រកបដោយផ្លែផ្កា និងជាក់ស្តែង ទឹកចិត្តស្រលាញ់ប្រទេសកម្ពុជា យ៉ាងជ្រាលជ្រៅរបស់ឯកឧត្តម និងក្រុមគ្រួសារ៕