ភ្នំពេញ៖ អាជ្ញាធរជាតិអប្សរា បានអំពាវនាវឱ្យប្រជាពលរដ្ឋបញ្ឈប់ការចែករំលែកព័ត៌មានដែលផ្ទុយពីការពិត និងគ្មានប្រភពច្បាស់លាស់ ពាក់ព័ន្ធនឹងតម្លៃសេវាកម្មថតវីដេអូ និងរូបភាពរបស់អាជ្ញាធរជាតិអប្សរា។ នេះបើតាមសេចក្តីប្រកាសព័ត៌មានរបស់អាជ្ញាធរជាតិអប្សរា ដែលចេញផ្សាយនាថ្ងៃទី៦ ខែសីហា ឆ្នាំ២០២៤។

ក្រោយមានការចុះផ្សាយនៅតាមបណ្តាញសង្គមមួយចំនួន អំពីការតម្លើងតម្លៃសេវាកម្មថតវីដេអូ និងរូបភាព អាជ្ញាធរជាតិអប្សរា បានបញ្ជាក់ថា តម្លៃសេវាសម្រាប់ប្រភេទអាជីវកម្ម ដែលបានកំណត់ក្នុងសេចក្តីជូនដំណឹងកាលពីថ្ងៃទី០២ ខែសីហា ឆ្នាំ២០២៤ គឺជាតម្លៃនៃសេវាកម្មអនុវត្តតាំងពីឆ្នាំ២០១២ ដែលមិនមានការតម្លើងតម្លៃឡើយ ខណៈដែលតម្លៃមួយចំនួន ត្រូវបានកែសម្រួលបន្ថយផងដែរ។

ចំពោះ តម្លៃសេវាសម្រាប់ប្រភេទអាជីវកម្មនានាដែលដាក់ឱ្យអនុវត្ត គឺមានចំនួន ៤ជម្រើស ដែលសាធារណជនអាចជ្រើសរើសយកជម្រើសណាមួយដែលមានតម្លៃសមរម្យ ក្នុងនោះរាល់តម្លៃសេវាទាំងអស់ ត្រូវបង់ផ្ទាល់ទៅក្នុងធនាគារជាតិសាខាខេត្តសៀមរាប។ អាជ្ញាធរជាតិអប្សរា បានលើកទឹកចិត្តឱ្យសាធារណជនទាំងអស់ អានតារាងតម្លៃសេវាសាធារណៈផ្លូវការ ដែលមានក្នុងគេហទំព័រហ្វេសប៊ុកផេក របស់អាជ្ញាធរជាតិអប្សរា៕