ភ្នំពេញ៖ ក្រសួងទេសចរណ៍ និងធនាគារជាតិនៃកម្ពុជា ពិភាក្សាពីកិច្ចសហការផ្សព្វផ្សាយឱ្យកាន់តែទូលំទូលាយនូវកម្មវិធីទូទាត់បាគងទេសចរ (Bakong Tourists App) ដែលនឹងអាចមានកិច្ចសហប្រតិបត្តិការជាមួយនឹង Visit App Cambodia ដើម្បីសម្រួលដល់ការទូទាត់របស់ភ្ញៀវទេសចរអន្តរជាតិ។

ក្នុងជំនួបរវាង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវបណ្ឌិត ជា សិរី ទេសាភិបាលធនាគារជាតិ ភាគីទាំងពីរ លើកឡើងថា កិច្ចសហការខាងលើនេះ នឹងជួយផ្សព្វផ្សាយសារមន្ទីរសេដ្ឋកិច្ច និងរូបីយវត្ថុព្រះស្រីឦសានវ័រ្មន (ស.ស.រ.) ដែលជាផលិតផលទេសចរណ៍ប្រវត្តិសាស្ត្រមួយ ដែលស្ថិតនៅចំកណ្តាលបេះដូងរាជធានីភ្នំពេញ ព្រមទាំងចូលរួមផ្សព្វផ្សាយនូវយុទ្ធនាការទស្សនាកម្ពុជា នៅរដូវកាលបៃតង ចាប់ពីខែឧសភា ដល់ខែតុលាផងដែរ។

ឯកឧត្តមរដ្ឋមន្ត្រីក្រសួងទេសចរណ៍ វាយតម្លៃខ្ពស់ចំពោះសមិទ្ធផល ដែលធនាគារជាតិ សម្រេចបាននាពេលកន្លងមក មានការទទួលយកប្រាក់ដុល្លារ ដែលចាស់ ឬប្រឡាក់, ប្រព័ន្ធទូទាត់បាគង និងការដាក់ឱ្យដំណើរការ «Bakong Tourist App» ដែលរួមចំណែកគាំទ្រវិស័យទេសចរណ៍នៅកម្ពុជា តាមរយៈការជួយសម្រួលដល់ការទូទាត់របស់ភ្ញៀវទេសចរអន្តរជាតិ ដែលមកកម្សាន្តនៅកម្ពុជា។ គួរបញ្ជាក់ថា ក្រសួងទេសចរណ៍ និងធនាគារជាតិ ឯកភាពពង្រឹងកិច្ចសហការលើកកម្ពស់វិស័យទេសចរណ៍ និងជំរុញការប្រើប្រាស់ប្រាក់រៀល ដើម្បីលើកស្ទួយអត្តសញ្ញាណជាតិ៕